ACB
Bilbao Basket-Valladolid (93-70): Garaipen handia lortu dute etxekoek
Erredakzioa
Katsikarisen taldeak hasiera partida negargarria egin du, baina emaitzari buelta eman eta gaztelarrak jipoitzen amaitu dute partida.
Bizkaia Bilbao Basket Blancos de Rueda Valladolidi gailendu zaio 93-70 argi batekin. Talde-lanean bikain aritu dira bizkaitarrek, lau jokalarik 15 puntu baino gehiago egin baitituzte.
Katsikarisenek, baina, intentsitaterik gabe eta erritmo eskasarekin ekin diote partidari. Liga ezberdinetako taldeak zirela zirudien eta pucelarrek kantxan nahi beste egiteko aukera izan dute. Di-da batean, bisitariek 4-16koa jarri dute markagailuan.
Alarmak piztu ditu hasiera kaskarrak. Esnarazteko balio izan die, bederen. Une horretarik aurrera Bilbao Basketen suspertzea etorri da. Pixkanaka-pixkanaka, Katsikarisen taldeak lehendabizi errenta murriztu du (20-25, 10. minutuan) eta ostean aurretik ere jarri da (12. minutuan, 26-25).
Bizkaia jaun eta jabe izan da azken txanpan. Etxekoek errenta hamar puntuen inguruan jarri dute talde-lanari etekina aterata. Jackson, Mumbrú, Hernández-Sonseca, Vasileiadis, Blums, Warren eta Mavroeidisek hamar puntuko balorazioa gainditu egin dute. Eredugarria.
Azken laurdenean, aldapa behera jokatu dute Katsikarisen jokalariek, errenta 20 puntuetatik gora jarriz eta denboraldiko 12. garaipena lortuz.