Gescrap Bizkaiak seigarren garaipena jarraian lortu nahi du

Blancos de Rueda Valladolid hartuko du igande honetan Gescrap Bizkaiak Bilbao Arenan (12:30). Sailkapeneko azkenaren aurka seigarren garaipena jarraian lortu nahi dute bilbotarrek, 'play off' postuetan sendo jarraitzeko. Gainera, laugarren postua lortzeko aukerekin jarraitu nahi dute Katsikarisen mutilek.

Helburua lortzen baldin badu, talde bizkaitarrak azken 15 neurketetatik 12 irabaziko lituzke, hurrengo jardunaldian Valentziako kantxa bisitatu baino lehen.

'Beltzezko gizonentzat' une ezin hobean heltzen da neurketa. Euroligatik at geratu eta gero Endesa Ligan kezka bakarra dute bizkaitarrek eta Fuenlabrada, Estudiantes, Banca Cívica, Gran Canaria eta Blusens Mombus jarraian mendean hartu dituzte.

Gainera, Fotis Katsikaris Gescrapeko entrenatzaileak jokalari guztiak prest ditu berriro. Marko Banic kapitainak arazo fisikoak gainditu ditu, azken bi jardunaldietan baja izan da tendinitisak jota.