FIBA Europe Cup
Anwil Wloclawek, BC CSU Sibiu eta Caledonia Gladiators, Bilbao Basketen aurkariak FIBA Europe Cupen
EITB MEDIA
2022-23 denboraldian, Poloniako Anwil Wloclawek taldeak irabazi zuen txapelketa; Errumaniako BC SBU Sibiuk hirugarren postuan amaitu zuen bere herrialdeko Liga; eta Caledonia Gladiatorsek BBL Trophy txapelketa irabazi zuen (British Basketball Leaguek antolatzen du).
Adam Smith, jokaldiaren bila, 2022-23 denboraldiko partida batean. Argazkia: EFE.
Anwil Wloclawek (Polonia), BC CSU Sibiu (Errumania) eta Caledonia Gladiators (Eskozia) izango dira Surne Bilbao Basketen aurkariak 2023-24 denboraldiko FIBA Europe Cup txapelketako multzo fasean, arratsaldean Munichen (Alemania) egindako zozketak zehaztu duenez. Multzo fase hori urriaren 18an hasiko da, eta orduan estreinatuko da Bilbao Basket FIBA Europe Cupen; izan ere, aurreneko aldiz ibiliko da Bilboko taldea txapelketa horretan. Orain arte, Bilbao Basketek hamar aldiz jokatu du Europako txapelketaren bat: behin Euroliga, zazpi aldiz Eurocup eta birritan Txapeldunen Liga.
Jaume Ponsarnauren taldeak FIBA Europe Cupen izango dituen aurkariak aztertuta (Bilbao Basket B taldean izango da, eta guztira 10 multzo dira), Anwil Wloclawek nabarmendu beharra dago, txapelketako egungo txapelduna baita. Finala udaberrian jokatu zuten, partida bikoitza eginda, eta Poloniako taldeak Frantziako Cholet menderatu zuen: etxean, Wloclaweken, martxoaren 19an, 81-77; eta Choleten, apirilaren 26an, 78-80. Halaber, Anwil Wloclawekek Poloniako hiru Liga eta lau Kopa irabazi ditu. Etxeko talde gisa, Hala Mistrzow pabiloian jokatzen du; 4.000 zaleentzako edukiera du.
BC CSU Sibiuk, ordea, hirugarren postuan amaitu zuen Errumaniako Liga, 2022-23 denboraldian. Transilvaniako taldea Cluj-Napocak kanporatu zuen, 3-1eko emaitzarekin, finalaurrekoetan (Cluj-Napoca gailendu zen Ligan, azkenean), baina hirugarren posturako play-offean, Rapid Bukarest hartu zuen mendean (3-2). Sibiun jokatzen du etxeko talde bezala, Sala Transilvania pabiloian; 1.790 lagun sartu ahal dira bertan.
Caledonia Gladiators Glasgowko taldea da. Aurreko denboraldian, BBL Championshipen, alegia, Erresuma Batuko txapelketa nagusian, final-laurdenetan kanporatu zuten, play-offetan. BBL Cupen, finalerdietaraino heldu zen; eta BBL Trophy txapelketan lortu zuen arrakastarik handiena, irabazi egin baitzuen. BBL Trophyan BBL Championshipen dabiltzan taldeek hartzen dute parte, baita beste talde gonbidatu batzuek ere. Caledonia Gladiatorsek Playsport Arena pabiloian jokatzen du; 1.800 zale har ditzake.