Bilbao Basketek bolada onari eutsi eta Kopara hurbildu nahi du

Gescrap babeslearekin kontratua eten eta gero, Bilbao Basketek aurreneko partida jokatuko du larunbatean (18:00etan). Bizkaitarrek Assignia Manresa hartuko dute Bilbao Arenan. Bilboko taldeak bolada onari eutsi nahi dio eta bide batez pauso berri bat eman Gasteizko Errege Kopan izateko.

Eurocupeko Last 16rako sailkapena lortu berri dute bilbotarrek eta une goxoari jarraipena eman nahi diote Miribillan. Beltzezko gizonen ibilbidea goraipatzekoa izan da orain arte; izan ere, etxean jokatutako sei neurketak irabazi dituzte, lau ligan eta bi Eurocupen.

Gainera, garaipenak hirugarren postura jauzi egiteko aukera eman diezaioke Bilbao Basketi; izan ere, 7-2ko balantzea duten beste bi taldeek elkarren kontra jokatzen dute jardunaldi honetan, Kanaria Handia Herbalifek eta Valentzia Basketek, alegia.

Fotis Katsikarisek jokalari guztiak prest ditu Manresa hartzeko. Raul Lopez eta Adrien Moerman sendatu dira, eta Lukoil Academicen aurka minutu batzuk jokatu zituzten asteazkenean.