Euroliga Top 16
Baskoniak beharrezkoa du garaipena
Erredakzioa
Khimkin irabazi behar du Gasteizko taldeak, ostiralean 16:25ean, zuzenean ETB-1en eta eitb.com-en. Besteen emaitzen zain egongo da, gainera.
Zan Tabak. Argazkia: EFE.
Baskoniak irabazteko premiarekin jokatuko du Errusian. Khimkiri gailenduta ere, Top 16ko F taldeko gainontzeko emaitzak Gasteizko taldearen interesen alde joatea beharrezkoa zaio Baskoniari. Norgehiagoka zuzenean emango dute ETB-1ek eta eitb.com-ek, ostiralean 16:25etik aurrera.
71-83 galdu zuen Caja Laboralek, etxean, Khimkiren aurkako joanekoan. Gasteizko taldeak, beraz, 10 puntuko aldea lortzea du helburu itzuliko partidan, azken jardunaldira aukera gehiagorekin heltzeko.
Hiru txartel geratzen dira F taldean final-laurdenak jokatzeko. Baskonia, Khimki Mosku, Olinpiakos, Makabi Tel Aviv eta Montepaschi Siena daude sailkapenaren lehian. Top 16ko azken bi jardunaldien aurrean, Errusiako, Greziako eta Israelgo taldeek baino garaipen bat gutxiago du Arabako taldeak.
Aurkarien emaitzen zain egongo da Baskonia, baina berak ere irabazi behar dio Khimkiri. Jokalari guztiak jokatzeko prest izango ditu Zan Tabakek. Irabaziko balu, azken aurkera izango luke azken jardunaldian, etxean Montepaschiren kontra. Horretarako, kontzentratuta jokatu beharko du Baskoniak, intentsitatea jaitsi gabe.