Igandean, 13:15ean
Baskoniak konfiantza berreskuratu nahi du, Herbalifen aurka
Erredakzioa
Scarioloren gizonek Kanaria Handiaren kontra jokatuko dute bigarren itzuliko aurreneko norgehiagoka. Jarraitu partida, zuzenean, eitb.com-en.
Nocioni Herbalifen aurka. Artxiboko argazkia: EFE
Laboral Kutxak Herbalife Kanaria Handiaren aurka jokatuko du Endesa Ligako bigarren itzuliko lehenengo partida. Gasteizko taldea bolada kaskarrean dago, azken hiru partidak galdu ondoren (Olinpiakos, Fuenlabrada eta Anadolu Efes), eta Errege Koparako konfiantza berreskuratu beharko du.
Arabako taldea gorabehera ugari izaten ari da, eta Sergio Scariolok zalantzak uxatu beharko ditu, Malagako Errege Kopan sasoi onean lehiatzeko.
Herbalifen aurkako norgehiagoka prestatzeko Baskoniak denbora gutxi izango du, ostiralean porrot mingarria jaso baitzuen etxean, Anadolu Efesen kontrako Euroligako partidan. Gainera, neurketa horretan Adam Hangak min hartu zuen esker izterrean, eta hungariarra hamar egun inguru izango da baja.
Azkeneko denboraldietan Kanaria Handiak neurria hartu dio Laboral Kutxari. Denboraldi honetako aurreneko partidan, Pedro Martinezen gizonek Buesa Arenan irabazi zuten, eta iaz, playoffetan, horiek aise kanporatu zuten Arabako taldea. Jokatu dituzten azkenengo lau partidetatik, Baskoniak bat soilik irabaztea lortu du.
Jarraitu norgehiagoka zuzenean ETBKn eta eitb.com-en, igandean, 13:15etik aurrera.