76-86
Dolomitik Diputazio Saria irabazi du Baskonia gainditu ostean
Erredakzioa
Laboral Kutxa Baskoniak 76-86ko emaitzarekin galdu du Buesa Arenan jokatu duen partida eta garaikurra talde bisitariarentzat izan da.
Your browser doesn’t support HTML5 video
Dolomiti Energia Trento taldea izendatu da Diputazio Sariaren irabazle, Baskoniari 76-86 irabazi ostean. Talde bisitaria nagusi izan da hasieratik amaieraraino.
Talde bisitariak indartsu ekin dio lehiari eta 2-9 jarri da aurretik. Ondoren Baskoniaren erreakzioa etorri da, baina lehen laurdena Dolomiti taldearen aldeko 18-23ko emaitzarekin bukatu da. Bigarren laurdenean, gauzak ez dira hobeto joan Laboral Kutxarentzat. Lehen minutuetan, Perasovicen mutilek aldeak murriztea lortu dute (25-26), baina Trentoko taldea orduan esnatu da, eta Baskonia hamar puntuko desabantailarekin iritsi da atsedenaldira (33-43).
Hirugarren laurdenaren hasieran, Laboral Kutxak markagailuan gerturatzea lortu du, baina Dolomitik ez dio bere jokoa egiten utzi eta aldeak handitu ditu laurdenaren amaieran (52-65).
Azken laurdenera 13 puntuko desabantailarekin iritsi da Baskonia eta emaitza iraultzen saiatu diren arren, Dolomiti taldea sendo mantendu da. Ondorioz, garaipenak ez dio ihes egin. 76-86ko emaitzarekin, Dolomiti Energia Trento taldeak Diputazio Saria irabazi du.