Baskoniak garaipenarekin ekin nahi die finalerdiei, Bartzelonaren aurka

Kirolbet Baskoniak gaur ekingo die Endesa Ligako play-offeko finalerdiei. Bartzelona izango du aurkari Arabako taldeak, eta lehen partida Buesa Arena pabiloian jokatuko da, 21:00etan.

Tornike Shengeliaren zalantza du Baskoniak partida honetarako. 'Toko'k kolpe gogorra hartu zuen saihets aldean eta ezin izan zuen azken entrenamendua burutu. Horren osasun egoeraren eboluzioa ikusi beharko da datozen orduotan, baina azken ordura arte izango dute zalantza.

Kantxa faktorea alde duela, Baskoniak ez du inoiz galdu Bartzelonaren aurka aurretik finalerdietan jokatu dituen hiru kanporaketetan. Real Madrilekin batera, liga erregularreko bi talde onenetakoak izango dira aurrez aurre. Bartzelona bigarren talde onena da erasoko jokoan, eta Baskonia, hirugarrena. Defentsan, Baskonia bosgarren talde onena da, eta Bartzelona, zazpigarrena. Asistentzien arloan, onena da Bartzelona, eta Baskonia, bigarrena. Gainera, kanporaketa honek azken Endesa Liga irabazi duen entrenatzailea (Pedro Martinez) eta Errege Kopa irabazi duen azkena (Svetislav Pesic) izango ditu aurkari.

Bartzelonak ere baditu arazoak. Pau Ribasen parte hartzea zalantzan dago arazo fisikoen ondorioz, eta Pierre Oriolak ere zail izango du astelehenean jokatzea. Bestalde, Rakim Sandersek ez zuen jokatu ostiralean, MoraBancen aurka, eta ikusteko dago erabaki teknikoa izan zen edo arazo fisikoak dauden horren atzean.