Buesa Arenan
Caja Laboral- CAI Zaragoza (79-61): Garaipen erosoa
Erredakzioa
Ivanovicen mutilak eraso bikaina gauzatu dute talde aragoiarraren aurka eta Teletovicek (30 puntu) eta Baracek (16 puntu) erraz erabaki dute norgehiagoka.
Garaipen garrantzitsua lortu dute arabarrek (79-61), Teletovic eta Barac erasoan ezin izan dituztelako gelditu zaragozarrek. Mirza Teletovicek 30 puntu eta 32ko balorazioa lortu du eta Stanko Baracek 16 puntu eta 21eko balorazioa.
Baskoniak ezin hobeto hasi du norgehiagoka, Mirza Teletovicen hirukoei esker intentsitate handia sartu duelako kantxan. Gasteiztarrek 17-9koa jarri dute markagailuan eta Zaragozako taldeak ezin izan du Caja Laboralen erasoa gelditu. Loganek ere saskiraketa garrantzitsuak lortu ditu arabarrentzat eta etxeko taldeak alde polita hartu du lehen laurdenaren bukaeran (31-16), Teletovicek lortutako 16 puntuei esker.
Bigarren laurdenean Ivanovicen taldeak nahiko jaitsi du erritmoa, baina Baracek eta Olesonek markagailuko aldea mantentzeko saskiraketa erabakigarriak lortu dituzte. Carlos Cabezas jokoan sartzen hasi da CAI Zaragozarentzat eta 10 puntura jarri dira Aragoikoak (35-25). Hala ere Baskoniak ondo mantendu du defentsa eta atsedenaldira gasteiztarrak 45-32 aurretik joan dira.
Hirugarren laurdenean Mirza Teletovicek berriz ere hartu du taldeko pisua erasoan eta Baskonia gelditu ezinik ibili da CAI. Etxekoek saskiraketa errazak lortu dituzte eta markagailuan alde ederra lortu dute (64-36). Zaragozakoak defentsan ahul egon dira eta Caja Laboralek 68-45 bukatu du hirugarren partziala, partida ia erabakita utziz.
Azken laurdenean kanpoko taldeak aldea murriztu du markagailuan (72-58), baina Baskoniaren defentsa sendo jarri da une erabakigarrietan. Baracek eta Teletovicen agintzen jarraitu dute erasoan eta errebotean eta garaipena Buesa Arenan gelditu da (79-61) Caja Laboralek erasoan partida borobila jokatu baitu.
Fitxa teknikoa:
79. Caja Laboral (31+14+23+11): Huertas (3), Oleson (11), San Emeterio (4), Teletovic (30), Barac (16) -hasierako bostekoa-, Ribas, Logan (11), Batista (2), Bjelica (2).
61. CAI Zaragoza (16+16+13+16): Van Roosom, Quinteros (4), Barlow (14), Chubb (10), Hettsheimeir (15)-hasierako bostekoa-, Cabezas (10), Miso (2), Toppert (3), Aguilar (3).