Sasoi betean dagoen Scolaren Milan gainditzen saiatuko da gaur Baskonia

Kirolbet Baskoniak eta Luis Scolak bat egingo dute berriz ere ostegun honetan, 12 urte geroago. Pibot argentinarra ezinbesteko jokalaria izan zen Gasteizko taldean zazpi denboraldiz, baina egun Armani Milanen ari da jokatzen, eta bi taldeak aurrez aurre izango dira Euroligako zazpigarren jardunaldian. Partida Milango Mediolanum Forum kantxan jokatuko da gaur, 20:45etik aurrera.

2007an, Scolak idolo gisa utzi zuen Gasteiz, eta NBAra abiatu zen. Bertan, ibilbide emankorra garatu zuen hamar urtez, eta, ondoren, Txinako saskibaloian aritu zen. Iragan udan, Argentinako selekzioarekin jokatutako Munduko Txapelketa bikainaren ondoren, Armani Milanek 39 urteko jokalaria fitxatzea erabaki zuen, eta orain izar bihurtu zen taldearekin egingo du topo.

Argentinarra oso maila ona ematen ari da Europara itzuli den urtean, eta talde italiarraren asmo handiko proiektuaren azken ukitua izan da. Scolaz gain, beste bi izen nabarmentzen dira Milanen: Ettore Messina entrenatzailea, aulkian, eta Sergio Rodriguez antolatzailea, jokoaren aginte-makilarekin. CSKA Moskun bi urteko ibilbide arrakastatsuaren ondoren (Euroliga irabazi zuen bertan), kanariarrak erakustaldiak ematen jarraitzen du Milanen.

Jokalari beterano arriskutsuen hirukotea Vladimir Micov hegaleko serbiarrak osatzen du. Baliabide horiekin, Armani bolada gozoan dabil, eta, bost garaipen jarraian lortu ondoren, ligaxkako lehen postuan dago sailkatuta, CSKA eta Bartzelonarekin batera.

Ondorioz, Baskoniak maila handiko konpromisoa izango du gaurkoan, eta beste behin ere etxetik kanpo aritzea egokituko zaio (bosgarren aldiz, orain arte jokatutako zazpi jardunaldietan). Aitzitik, Italian jokatu eta gero, hiru norgehiagoka kateatuko ditu etxean, Makabi, CSKA eta Zeniten aurka.

Arabarrek Euroligako defentsarik onena dute (69,3 puntu partidako), baina badakite horrekin ez dela nahikoa izango duela zazpi urtetik irabazten ez duen pista batean gailentzeko.

Bolada txar hori hausteko bidean, Jayson Granger izango da Perasovicen baja bakarra.