Asteazkenean, 20:00etan
Baskoniak hirugarren postua ziurtatzeko Fuenlabrada gainditu behar du
Erredakzioa
Sailkapeneko hirugarren postua eskuratzeko garaipena beharko dute Ivanovicen mutilek. Madrilgo taldeak mailari eusteko borrokan jarraitzen du.
Baskonia Fuenlabrada. Argazkia: EFE
Etxetik kanpora jokatutako azkenengo lau partidak galdu ostean, Baskoniak sailkapeneko hirugarren postua ziurtatzea bilatuko du Fuenlabradan. Dusko Ivanovicen mutilek azken lau partidetan soilik garaipen bat lortu dute eta sailkapeneko hirugarren postua ziurtatzeke dute. Gainera, playoffak hasteko soilik bi jardunaldi gelditzen dira eta Arabako taldeak sasoi onean heltzeko garaipenak lortu beharko ditu.
Etxetik kanpora martxoaren 3an irabazi zuen azkenengo partida Caja Laboralek Valentzia Basketen aurka. Ordutik hona, etxetik kanpora jokatutako beste neurketa guztiak galdu egin ditu Baskoniak.
Fuenlabradaren aurka Pablo Prigioni jokatzeko prest izango da sorbaldako tendinitisa gaindituta, baina Fernando San Emeterio kantabriarrak pubalgiarekin jarraitzen du eta ezin izango da Ivanovicen aginduetara aritu.