Zigorra
Dani Diezek, zigortuta, Endesa Ligako hurrengo bi partidak galduko ditu
EITB Media
Txapelketako epaile nagusiak bi partidako zigorra ezarri zion Baskoniako jokalariari, eta klubaren helegiteak ez dituztenez onartu, Diezek ezingo ditu jokatu Real Madrilen eta Bilbao Basketen kontrako neurketak.
Dani DiezBaskoniako joklaria, Tenerifen aurkako partida baten. Argazkia: EFE
Cazoo Baskoniako Daniel Diez jokalariak bi partidako zigorra bete beharko du Endesa Ligan. Txapelketako epaile nagusiak bi neurketako zigorra ezarri zion Madrilekoari, eta klubak aurkeztutako helegiteak ez dituztenez onartu, ezingo ditu jokatu Real Madrilen eta Bilbao Basketen kontrako norgehiagokak.
Diezez gain, epaileak Coviran Granadako Lluis Costari ere zigor bera ezarri dio. Bi jokalariek liskarra izan zuten euskal taldeak eta Andaluziakoak jokatutako neurketan.
Saski Baskoniak helegitea aurkeztu zuen martxoaren 15ean Espainiako Saskibaloiko Federazioaren Apelazio Batzordean, baina Daniel Diezentzat eskatutako kautelazko neurriak ukatuak izan ziren.
Apelazio Batzordearen ezezkoaren ostean, martxoaren 17an, Saski Baskoniak Kirol Arbitrajeko Auzitegira jo zuen, baina han ere helegiteak ez zituzten onartu. Ondorioz, Daniel Diezek bi partidako zigorra bete beharko du.