FITXAKETA
Baskoniak Miller-Mcintyre joko-antolatzailea fitxatu du hurrengo bi denboraldietarako
AGENTZIAK | EITB MEDIA
Turkiako ligan jarduten duen Gaziantep taldetik iritsiko da Arabako hiriburura. Aipatu taldean, batez beste, 15,4 puntu, 5,9 asistentzia eta 16,9ko balorazioa lortu zituen 2022-23 denboraldian.
Codi Miller-Mcintyre. Argazkia: Baskonia
Baskoniak Codi Miller-Mcintyre kanpoko jokalaria fitxatu duela jakinarazi du astelehen honetan. Antolatzaile estatubatuarrak (29 urte) Bulgariako pasaporte ere badauka, eta hurrengo bi denboraldietarako kontratua sinatu du Gasteizko taldearekin.
191 zentimetroko garaiera dauka, eta joko-zuzendari zein eskolta gisa jokatzeko gai da. Base altua eta indartsua da, defendatzaile ona, baina jaurtiketarekin arazo gehiago dituena.
Turkiako ligan jarduten duen Gaziantep taldetik iritsiko da Arabako hiriburura. Aipatu taldean, batez beste, 15,4 puntu, 5,9 asistentzia eta 16,9ko balorazioa lortu zituen 2022-23 denboraldian.
Miller-Mcintyrek eskarmentua dauka, aurretik Zenit San Petersburgon, Cedevita Olimpian edota Belgradeko Partizanen jokatutakoa baita.
ACB liga ere ezagutzen du, Morabanc Andorraren elastikoa defendatu baitzuen 2021-22 denboraldian (13,7 puntu eta 5,1 asistentzia, Ligan; 13,4 puntu eta 6,9 asistentzia, Eurokopan).