Baskoniak porrota jaso du Asvelen aurka (76-69)

Asvel nagusi izan da partidako lehen segundotik, eta Baskonia ezustean harrapatu du 8-0eko partzialarekin bi minutu eskasean. Irteera oldarkor horrek gaueko lehen hutsartea eskatzera behartu du Pablo Laso. Izan ere, Gasteizko taldeak ezin izan du defentsako intentsitatea egokitu, eta Frantziako taldeak 17-6ko abantaila lortu du.

Defentsan zertxobait hobetu den arren, Baskoniak zehaztasun falta handia erakutsi du jaurtiketetan, batez ere perimetrotik; hiruko 6 jaurtiketetan 0 puntu lortu ditu. Bien bitartean, Frantziako taldeak arriskua erraz sortzen jarraitu du, eta erasoko arintasunari eutsi dio. Hala ere, Baskoniak defentsako intentsitatea doitzea eta aldea murriztea lortu du, lehen laurdena 20-12ko emaitzarekin amaituz.

Bigarren laurdenean, Arabako taldearen zailtasunek bere horretan jarraitu dute. Gainera, Chima Moneke eta Markus Howard ez egoteak are gehiago murriztu ditu euskal taldearen erasoko aukerak.

Hala ere, Baskoniak alde handiagoa saihestea lortu du, eta atsedenaldira 38-26 galtzen joan da, jaurtiketetan izandako eraginkortasunik ezak (2/14, hiruko jaurtiketetan) eta sormen faltak markatutako lehen zatiaren ostean. Asvel taldearen aldetik, berriz, Sako eta Maledon izan dira aipagarrienak, 10 eta 9 punturekin, hurrenez hurren.

Atsedenaldiaren ostean, Baskoniak nabarmen hobetu du bere jokoaren erritmoa. Asvelek erraz saskiratzen jarraitzen zuen arren, Pablo Lasoren jokalariek erasoko eraginkortasuna handitu dute Howard eta Monekeri esker.

Azken minutuetan, Baskoniak ondo mugitu du baloia, eta aldeak murriztu ditu, partidan lehen aldiz aurretik jartzeko, Chima Monekeren hiruko bati esker (53-54); izan ere, azken laurdenean, Chima Moneke izan da Baskoniaren liderra, 13 puntu jarraian lortuta.

Luwawu-Cabarrotek beste hiruko batekin erantzun du, 58-67ko markagailua Baskoniaren alde jartzeko, 4 minutu falta zirela. Maledonek eta Jacksonek egindako 16-0ko partzialari esker, baina, Asvelek buelta eman dio partidari.

Fitxa teknikoa:

76 - Asvel: Lee (9), Maledon (25), Lighty (5), Schofield (4) eta Sako (14); Harrison, Kahudi, Lauvergne (6), Jackson (11), De Colo (5) eta Ndiaye.

69 - Baskonia: Baldwin (10), Howard (7), Moneke (18), Ndiaye eta Hall (15); Luwawu-Cabarrot (7), Forrest (9) eta Diop (3).

Epaileak: Milan Nedovic, Borys Ryzhyk eta Leandro Lezcano.