Eurokopako 5. jardunaldia
Lointek Gernika, sailkapena ziurtatzeko asmoz gaur Hungarian
EITB.EUS
Gyorren aurka irabazi nahi dute bizkaitarrek, F multzoko bigarren postua behin betiko bereganatu eta Eurokopako hurrengo fasean egongo dela bermatzeko.
Gernikakoek badakite Gyorren aurka irabaztea zer den, lehen itzulian egin baitzuten. Argazkia: ETB
Lointek Gernika Bizkaiak Hungarian jokatuko du gaur, 18:00etan, Uni Gyor taldearen kontra, Eurokopako multzoen faseko bosgarren jardunaldiari dagokion neurketan. Bizkaitarren helburu bakarra irabaztea izango da, F multzoko bigarren postua ziurtatzeko asmoz.
Lehen itzulian Malosten jokatutako partidan, gernikarrek garaipen argia lortu zuten Hungariako taldearen aurka (77-41), eta gauza bera errepikatu nahi dute etxetik kanpo ere.
Hala ere, galduz gero, Lointekek eutsi egin beharko lioke Gyorrekin duen 36 puntuko alde zabalari, hurrengo kanporaketarako sailkapena eman bailiezaioke. Izan ere, azken jardunaldian, Portugalgo Olivais taldea izango dute aurkari gernikarrek Malosten (Olivais da multzoen fase honetan oraindik irabazi ez duen talde bakarra). Gyorrek, berriz, orain arteko norgehiagoka guztiak irabazi dituen Perfumerias Avenida ahalguztiduna izango du aurrean.