Eurokopa
Lointek Gernika Bizkaia Eurokopako multzoen fasean lehiatuko da Phantomsi bigarrenez jarraian irabazi ostean
A. B. E. | EITB Media
Gernika-Lumoko taldeak 92 eta 51 irabazi du Eurokopara sailkatzeko atariko kanporaketako itzuliko partida eta joanekoan ere garaipena eskuratu zuenez 40 puntuko abantailarekin multzoen fasean egongo da.
Lointek Gernika Bizkaiako jokalariak zaleak agurtzen garaipena lortu ostean. Argazkia: EITB Media
Lointek Gernika Bizkaiak Eurokopako multzoen faserako txartela eskuratu du asteazken honetan (urriak 12) Malosten (Gernika-Lumo) jokatu duen atariko kanporaketako itzuliko partidan Phantoms Boom Basket taldea mendean hartuta 92-51ko emaitzarekin. Joanekoan ere euskal taldea nagusitu zen (62-102) 40 puntuko abantaila erdietsita.
Itzuliko neurketan jaun eta jabe izan da Gernika-Lumoko taldea hasieratik amaieraraino. Lehen hamar minutuetan 8 puntuko errenta lortu du etxeko taldeak (21-13), norgehiagoka erabakita utzita atsedenaldira iristerakoan (47-25).
Atsedenaldiaren ostean partidaren gidoia ez da aldatu; Lointek Gernika Bizkaiak nagusi izaten jarraitu du, abantaila handitzearekin batera. Hirugarren laurdenera Bizkaiko taldearen aldeko 69-35eko emaitzarekin bukatu da.
Azken laurdenerako lehia erabakita egon da, eta Lointek Gernika Bizkaiak erakustaldia biribildu du (92-51).
Gernika-Lumoko taldea Eurokopako H multzoan lehiatuko da Reyer Venecia (ITalia), Rutronik Stars Keltern (Alemania) eta Movistar Estudiantes (Espaiia) taldeak aukari izango dituelarik. Lointek Gernika Bizkaiak urriaren 27an (18:30ean) jokatuko du bere lehen partida txapelketan honetan Rutronik Stars Kelternen kontra Alemanian.