Euroliga
Maccabi Tel Aviv taldeak Belgraden jokatuko ditu etxeko partidak
AGENTZIAK | EITB MEDIA
Baskoniaren aurkako Euroligako norgehiagoka abenduaren 19rako dago aurreikusita, Europako txapelketako 15. jardunaldiaren baitan.
Maccabik eta Baskoniak jokatutako Euroliga partida bateko artxiboko irudia. EFE
Maccabi PlaytikaTel Aviv taldeak Belgraden jokatuko ditu Euroligako etxeko partidak, Aleksandar Nikolic Hall pabiloian, astearte honetan Europako txapelketa nagusiko akziodunek Istanbulen egindako bileran erabakitakoaren arabera. Israeldarrek azaroaren 9an jokatuko dute lehen neurketa Serbiako hiriburuan, Bayern Munichen kontra. Azaroaren 2rako Real Madrilen aurka aurreikusitako partida bertan behera utzita dago oraingoz, eta aurrerago jokatzea espero dute. Baskoniak abenduaren 19an egin beharko du bidaia Belgradera Maccabirekin neurtzeko, Euroligako 15. jardunaldian.
Maccabik Belgradeko Udalaren eta Serbiako Gobernuaren babesa jaso du. Laster hasiko dira taldearen segurtasuna ziurtatzeko beharrezkoak diren neurrien antolakutzan lanean.
Gainera, Israeldik kanpo dagoen beste leku bat proposatzeko eskatu dio Euroligak Hapoel Shlomo Tel Aviv taldeari.