Eurokopa
IDK Euskotrenek Gascan erabaki ahalko du Charnayren aurkako play-offa, joanekoan berdinduta (68-68)
EITB MEDIA
Oso parekatua izan den neurketan, Azu Muguruzaren jokalariek, kanporaketako lehen partidan, final zortzirenak eskura utzi dizkien emaitza lortu dute: itzuliko partidan, Donostian, edozein garaipenek emango lioke sailkatzea IDK Euskotreni.
IDK Euskotrenek, hilaren 18an, partida oso garrantzitsua jokatuko du Gascan. Argazkia: EITB Media.
IDK Euskotrenek berdindu egin du, 68-68, Charnay Bourgogne Suden aurka, 2024-25 denboraldiko Eurokopako play-offeko 1. txandako joaneko partidan, Salles des Sports Principalen, Frantziako Prissen, asteazken gauean. Hala, euskal taldean Gascan erabaki ahalko du, etxean, final hamaseirenetako kanporaketa hau; izan ere, edozein garaipenek, alde handiz zein txikiz, sailkatzea emango dio talde irabazleari. Datorren asteazkenean, hilaren 18an, Donostian izango den hitzordu garrantzitsuan, IDK Euskotrenek zalen babesa izango du.
Joaneko norgehiagokan, Charnay eta IDK Euskotren oso parean aritu dira. Donostiako taldeak bigarren laurdenean lortu du bere aldeko alderik handiena, hamar puntukoa, 29-39koan, baina orduan hasi da, hain zuzen ere, Azu Muguruzaren taldearen unerik txarrena, hamaika puntu jarraian jaso dituztelako eta, partidako bigarren zatiko hasieran, markagailuan behetik zeuden. Partidan zehar, IDK Euskotren Charnay baino gehiagotan izan da gailentzen, aldeak esanguratsuak ez badira ere, eta Charnay, Shakayla Thomasek eta Monique Makanik gidatuta, Gipuzkoako taldearen parean heldu da partida amaierara.
Berdinketak, hortaz, itzuliko partidari ematen dio kanporaketa zehazteko ardura. Gascako neurketan, sari oso handia izango da jokoan: final zortzirenetarako sailkatzea, garaipena lortzen duen taldearentzat.
IDK Euskotrenen, besteak beste, Alba Prieto, Niyah Becker eta Louice Halvarsson aritu dira oso ondo. Prietok 15 puntu sartu ditu, eta sei errebote hartu; Beckerrek 14 puntu egin ditu; eta Halvarssonek hamar puntu sartuta eta zazpi errebote hartuta eman dio amaiera partidari.
Fitxa teknikoa
68 - Charnay: Makany (21), Strautmante, Garrick (10), Chabrier (6), Taddy (4)-hasierako bostekoa- Gaye, Daramy (4), Dalstra, Klavi, Thomas (23), Desset.
68 - IDK Euskotren: Roso Buch (4), Lara González (10), Becky Massey (3), Claessens (6), Pendande (6) –hasierako bostekoa–, Alba Prieto (15), Halvarsson (10), Becker (14), Mbulito eta Washington.
Epaileak: Emma Perry, Gavin Williams eta Anna Belousova.
Nabarmentzeko: 1.000 bat zale, Salles des Sports Principalen.