Algarveko Itzulia, 3. etapa
Jonathan Castroviejo nagusi, erlojuaren kontrakoan
Agentziak | Erredakzioa
Bizkaitarrak lau segundoko aldea atera dio Tony Martin alemaniarrari eta bost segundokoa Primoz Roglic sailkapen nagusiko liderrari.
Your browser doesn’t support HTML5 video
Jonathan Castroviejo getxoztarrak (Movistar Team) erakustaldia eman du Algarveko Itzuliko erlojuaren kontrakoan. Bizkaitarra nagusi izan da hirugarren etapan, eta Tony Martin egungo txapeldunak baino denbora hobea egin du.
Bizkaitarra egungo Europako txapelduna da erlojuaren kontra, eta garaipena lortzeko aukerak zituela jakinda atera da errepidera, izan ere, ibilbidea bere alde izan du.
Etapa bukatuta, Castroviejok esan du garaipena "oso garrantzitsua" izan zela berarentzat, morala eman diolako antzerako lasterketei begira.
Algarveko Volta irabazteko aukeren inguruan galdetu diotenean, guztia azken etapan erabakiko dela esan du, azken 8 kilometroetako igoera oso gogorra delako.
Sailkapen nagusiari dagokionez, Primoz Roglic (LottiNL Jumbo) esloveniarrak lider jarraitzen du, etapan hirugarren denborarik onena egin ostean. Kwiatkowski bigarren da 22 segundora eta Castroviejo hirugarren 36 segundora.