San Juaneko Itzulia: 3. etapa
Alaphilippe nagusitu da erlojupekoan eta sailkapen nagusiko lidergoa lortu du
Agentziak | Erredakzioa
Frantziako txirrindulariak erlojupekoa irabazi du eta San Juaneko Itzulian lider jarri da. Laugarren etapak 185,8 kilometro eta lehen mailako bi mendate izango ditu.
Julian Alaphilippe. Argazkia: Twitter (@vueltasanjuanok)
Julian Alaphilippek (Deceuninck-Quick Step) sasoi onean dagoela erakutsi, eta Pocitoko erlojupekoa irabazi zuen. Horrekin batera, San Juaneko Itzuliaren lidergoa lortu zuen frantziarrak. Hurrengo jardunaldian, 185,8 kilometro eta lehen mailako bi mendate dituen ibilbidean arituko dira txirrindulariak.
Frantziako txirrindulariak 2019ko bere bigarren garaipena lortu zuen 12 kilometroko erlojupekoan, nagusitasun osoz gailenduz. Valerio Conti (UAE Team Emirates) sailkatu zen bigarren eta Remco Evenepoel (Deceuninck-Quick Step), Alaphilippen taldekidea, hirugarren.
Fernando Gaviria (UAE Team Emirates) kolonbiarrak, lehenengo bi jardunaldietan sailkapen nagusiko lehenengo postuan izan den txirrindulariak, lidergoa galdu zuen erlojupekoan irabazleak baino 21 segundo gehiago behar izan baitzuen ibilbidea egiteko.
Hala ere, jardunaldi honetako protagonista Iljo Keisse (Deceuninck-Quick Step) izan zen; izan ere, Club Pedal Olimpia San Juaneko Itzuliko antolatzaileak kaleratu egin du Belgikako txirrindularia, sexu abusuak egin izana egotzita.
Informazio ofizialen arabera, zerbitzari batek argazki bat egin zuen Deceuninck-Quick Step taldeko txirrindulari batzuekin, eta, argazkia ateratzen ari zenean, Iljo Keissek keinu sexuala egin zion 18 urteko gazteari.
San Juaneko Itzuliko laugarren etapak 185,6 kilometro izango ditu, eta Jachaleko San Jose eta San Agustin hiribilduaren artean ibiliko dira txirrindulariak. Jardunaldi honetan, lehen mailako bi mendate eta hirugarren mailako mendate bat igo beharko dute txirrindulariek.
|
Hirugarren etapako sailkapena |
Denbora | |
| 1 | Julian Alaphilippe (Deceuninck-Quick Step) | 13:41 |
| 2 | Valerio Conti (UAE Team Emirates) | +00:12 |
| 3 | Remco Evenepoel (Team Dimension Data) | d. b. |
| 4 | Felix Grosschartner (Bora-Hansgrohe) | +00:16 |
| 5 | Winner Anacona (Movistar Team) | d. b. |
| 6 | Fernando Gaviria (UAE Team Emirates) | +00:21 |
| 7 | Peter Sagan (Bora-Hansgrohe) | +00:26 |
| 8 | Tom Bohli (UAE Team Emirates) | +00:28 |
| 9 | Laureano Rosas (Asoc. Civil Mardan) | +00:30 |
| 10 | Oscar Sevilla (Medellin) | d. b. |
|
Sailkapen orokorra |
Denbora | |
| 1 | Julian Alaphilippe (Deceuninck-Quick Step) | 7:15:16 |
| 2 | Fernando Gaviria (UAE Team Emirates) | +00:18 |
| 3 | Valerio Conti (UAE Team Emirates) | +00:22 |
| 4 | Remco Evenepoel (Team Dimension Data) | d. b. |
| 5 | Felix Grosschartner (Bora-Hansgrohe) | +00:26 |
| 6 | Winner Anacona (Movistar Team) | d. b. |
| 7 | Peter Sagan (Bora-Hansgrohe) | +00:32 |
| 8 | Laureano Rosas (Asoc. Civil Mardan) | +00:40 |
| 9 | Oscar Sevilla (Medellin) | +00:41 |
| 10 | Simone Consonni (UAE Team Emirates) | +00:44 |