Lourdes Oyarbidek Movistarren jarraituko du beste denboraldi batez

Movistar taldeak hainbat txirrindulariren kontratuak luzatuko dituela iragarri du astelehen honetan, tartean Lourdes Oyarbide arabarrarena. Hala, Oyarbidek beste denboraldi batez jarraituko du Movistarreko elastiko urdina soinean duela, 2022ra arte. Asparrengoarekin batera, Alicia Gonzalezek (2022) Sheyla Gutierrezek (2023) eta Barbara Guarischik (2023) ere luzatu dute kontratua.

Sebastian Unzuek zuzentzen duen taldeak Oyarbideren eta Gonzalezen "lanerako gaitasuna eta adimen kolektiboa" eta Guarischiren eta Gutierrezen "esperientzia eta kalitate indibiduala" nabarmendu ditu. Oyarbide, Gonzalezekin batera, 2018tik daude taldean, hau da, Movistarrek emakumezkoen saila abiatu zuenetik.

Arabako kirolaria pozik azaldu da Twitter sarean duen profilean: "Urtebete gehiago familia handi honekin".

Horrela, Movistar taldeak dagoeneko 13 txirrindulari baieztatu ditu 2022ko denboraldirako, oraindik osatu gabe dagoen zerrendan: Katrine Aalerud (NOR), Aude Biannic (FRA), Jelena Eric (SRB), Sarah Gigante (AUS), Alicia González (ESP), Barbara Guarischi (ITA), Sheyla Gutiérrez (ESP), Sara Martín (ESP), Emma Norsgaard (DIN), Lourdes Oyarbide (EUS), Paula Patiño (COL), Gloria Rodríguez (ESP) eta Annemiek van Vleuten (NLD).