Maiatzak 10 eta 11
Nafarroako Emakumeen Klasikoan eliteko txirrindulari onenek hartuko dute parte
AGENTZIAK | EITB MEDIA
Maiatzaren 10ean eta 11n Irurtzunen eta Iruñean amaituko diren bi lasterketa izango dira.
Nafarroako Emakumeen Klasikoa. Argazkia: @Vuelta_Navarra
Tropeleko txirrindulari onenek parte hartuko dute Emakumeen Nafarroako Klasikoko lasterketetan. Maiatzaren 10ean eta 11n jokatuko dira, Irurtzunen eta Iruñean. World Tour mailako 6 talde izango dira, kirol honetako talde gorenak, hain zuzen.
Azken bi edizioetako irabazlea den Annemiek Van Vleuten (Movistar Team) bertan egongo da. Herbehereetako txirrindularia UCI rankingeko liderra da eta palmares bikaina du, 2021ean Tokioko erlojupekoan urrezko domina irabazita.
Horrela, Nafarroan egingo da klasiko honen laugarren edizioa. Lasterketak UCI mailakoak dira, elite mailako emakumezkoen kategoria nagusikoak.
Edizio honetan, hilaren 10ean, Irurtzunen irteera eta helmuga duen lehen proba egingo da. Ibilbideak 137 kilometro eta 2.700 metroko desnibel positiboa izango du, bederatzi haranetako parajeetan barrena: Arakil, Basaburua, Goñi, Imotz, Iza, Larraun, Leitzaldea, Malerreka eta Ollo.
Hurrengo egunean, maiatzaren 11n, 124,8 kilometroko ibilbidea gainditu beharko dute txirrindulariek. Iruñean hasi eta amaituko da, Olaberri, Tiebas, Biurrun, Tirapu, Artaxoa eta Erreniegara igota.