Jumbo-Vismako txirrindularia
Jumbo-Vismako Nathan Van Hooydonckek txirrindularitza utziko du, 27 urte dituela, bihotz anomalia batengatik
EITB MEDIA
Aurreko asteko asteartean, hilaren 12an, belgikarra ondoezik sentitu zen, gidatzen ari zela; Anbereseko Ospitalean egin dizkioten probetan, anomalia bat antzeman diote, eta, horren ondorioz, profesionala izateari utzi beharko dio.
Van Hooydonckek 27 urte dituela utzi behar izan du txirrindularitza. Argazkia: EFE.
Nathan Van Hooydonck txirrindulari belgikarrak txirrindularitza profesionala utziko du, 27 urte dituela, bihotz anomalia batengatik, asteazkenean Jumbo-Visma haren taldeak iragarri duenez. Duela egun batzuk, aurreko asteko asteartean, irailaren 12an, Van Hooydonck ondoezik sentitu zen, gidatzen ari zela; Anbereseko Ospitalean egin dizkioten probetan, anomalia bat antzeman diote, eta, horren ondorioz, profesionala izateari utzi beharko dio.
Jumbo-Vismak zehaztu duenez, asteartean Van Hooydoncki barne desfibriladore bat jarri zioten, "etorkizunean egon litezkeen balizko arritmiak zuzentzeko". Azken egunotan egindako proben ostean, txirrindulari belgikarrari bihotz anomalia bat diagnostikatu diote; horrek eragin zion hilaren 12an jasandako ondoeza: "Horrek Van Hooydoncken ibilbide profesionalaren amaiera dakar", azpimarratu du Jumbok.
Ziklistak, ordea, nabarmendu du "zorte handia" izan duela, azkar-azkar artatu zutelako: "Ondo nago orain, baina oraindik barneratu behar dut honek nire ibilbidearen amaiera dakarrela", adierazi du. Hemendik aurrera, sendatzea izango du helburu; aita izango da berehala, gainera.