Gallopinek garaipen handia lortu du Oyonnaxen

Tony Gallopinek (Lotto-Belisol) ustekabea eman die faboritoei Oyonnaxeko helmugan, eta bere lehenengo garaipena eskuratu du Frantziako Tourrean. Vincenzo Nibalik (Asteana) maillot horia mantendu du.

Frantziako txirrindulari gaztearen garaipena maillot horia galdu ondoren heldu da. La Planche des Belles Filleseko etapan eraman zuen jantzita, baina egun berean berreskuratu zuen Nibali.

Astanaren baimena zuen ihesaldi batean sartu zen Gallopin, eta Frantziako egunean horiz janztea lortu zuen, baina ezin izan zuen ezer egin Vosgoseko mendate gogorretan.

26 urteko frantziarraren inoizko garaipenik handiena da. Laurent Fignonen morroi baten semea eta Trekeko zuzendariaren iloba da Gallopin. Familiak ondo ezagutzen zituen etapako azken kilometroak, oso hurbil bizi baita. Gallopinek behin baino gehiago ikuskatu zuen etapa.

"Gutxik ezagutzen zuten nik bezala punturik ematen ez zuen azken igoeratxo hori. Beraz, erasoa hor jotzea erabaki dut. Azken kilometroak luzeegiak egin zaizkit", esan du.

Gallopinek, Frantziako txirrindularitzaren promesetako batek, hiru kilometro falta zirenean jo zuen erasoa, lau txirrindularik osatutako talde batetik alde egin zuen.

Horien artean Peter Sagan (Cannondale) zegoen. Ziur zegoen irabaziko zuela, ihesaldiko azkarrena zelako. Baina frantziarrak aldea ireki du, eta garaipenera abiatu da. Atzean zalantzat agertu dira, eta azkenean, metro bateko aldearekin sartu da Gallopin. Atzean, John Degenkolb (Giant-Shimano) izan da azkarrena.

Sailkapen orokorrean ez da aldaketarik egon, faborito guztiak Nibaliren taldean sartu baitira. Rui Costa (Lampre-Merida) izan da salbuespena. Munduko txapeldunak minutu bat baino gehiago galdu du, eta bederatzigarren postua galdu du. Andrew Talansky (Garmin-Sharp) lasterketa uzteko zorian egon da, baina bizikletara igo da berriro. Azkenean, 30 minutu baino gehiago galdu du helmugan.

11. ETAPAKO SAILKAPENAK

</p>