Geraint Thomasek bigarren garaipena lortu du Alpeetan, eta sendo jarraitzen du lider

Geraint Thomas Sky taldeko txirrindulariak lider sendoa dela erakutsi du ostegun honetan; izan ere, ostegun honetan bigarren garaipena jarraian lortu du Alpeetan, eta ez nolanahikoa gainera, Alpe D'Huez gainean irabazi baitu 175,5 kilometro bete eta gero.

Galestarra izan da sendoena sailkapen nagusia irabazteko faboritoen artean egin duten azken esprintean, eta, hartara, etapa lortzeaz gain lidergoa sendotu segundo apur batzuetan bada ere. Thomasen atzetik Tom Dumoulin herbeheretarra (Sunweb) bi segundora, Romain Bardet frantziarra (Ag2r) hirura eta Chris Froome britainiarra laura sartu dira. Haien atzetik sartu da Mikel Landa arabarra bosgarren tokian, zazpi segundoko atzerapenarekin.

Etapak aurreikusita zuen ikuskizuna eman du. Steven Kruijswijk izan da jardunaldiko protagonista nagusienetako bat, bera eta beste zenbait "oilar" (tartean Valverde, Barguil eta Zakarin) eguneko ihesaldian sartu dira, eta LottoNL-Jumboko txirrindulariak ihesean eutsi dio helmugarako 3,5 kilometro falta ziren arte. Ezin izan die eutsi Sky taldearen lanari eta Froomeren erasoaldiei.

Gaurkoa irabazita, Alpe D'Huez gainean elastiko horiarekin garaipena eskuratzen duen lehendabiziko txirrindularia bihurtu da Skyko kidea.

Bestalde, ostiral honetan, Tourreko hamahirugarren etapa jokatuko da, Bourg D'Oisans eta Valence artean jokatuko den ibilbidean zehar (169,5 kilometro).