Frantziako Tourra
Frantziako Tourraren irteeraren lekukoa emango dio gaur Euskadik Florentziari
AGENTZIAK | EITB MEDIA
2024ko Frantziako Tourraren irteera handia antolatuko du Florentziak, eta horren erreleboa irudikatzen duen garaikurra emango dio gaur Parisen Euskadik Florentziako Emilia-Romagnako alkateari. Euskadin izandako Tourraren lehenengo hiru etapek 840.000 pertsona inguru bildu zituzten.
Frantziako Tourraren irudietako bat, Euskaditik igarotzean. Argazkia: EFE
2024ko Frantziako Tourraren irteera handiaren erreleboa irudikatzen duen garaikurra emango dio igande honetan Parisen Euskadik Florentziako Emilia-Romagnari, 2023ko Frantziako Tourraren amaieran. Juan Mari Aburto Bilboko alkateak Trophy Tour trofeoa emango dio Florentziako Emilia-Romagna Grand Departeko ordezkari den Dario Nardella Florentziako alkateari, Eusko Jaurlaritzak jakitera eman duenez.
Tradizioari jarraituta, Pariseko Eliseo Zelaietan izandako etapa behin bukatuta, lekukoa hartuko du irteera handia antolatuko duen hurrengo eskualdeak, Florentziak, kasu honetan. Jaurlaritzak azpimarratu duenez, "2023ko Gran Depart Pays Basqueko antolakuntza, garapena eta ospakizuna egiteko euskal erakundeek abiatutako lanari amaiera borobila" emango dio lekukoaren emate horrek.
Parisen, Juan Mari Aburto Bilboko alkatearekin batera, Xabier Ochandiano Bilboko Udaleko Garapen Ekonomikorako eta Turismo zinegotzia eta Iker Goiria Gipuzkoako Foru Aldundiko Turismo zuzendaria izango dira. "Pello Bilbaok eta Ion Izagirrek euskal txirrindularitzarako lortutako bi garaipen handiak" gogoratu ditu Jaurlaritzak.
840.000 pertsona inguru izan ziren Euskadin Tourreko hiru etapaz gozatzen, eta "30.000 bat taldeen aurkezpenetan eta 106.300 Fan Parkean". "Laburbilduz, herritarrek dena eman zuten nazioarte mailako kirol ekitaldi handi honetaz bertatik bertara disfrutatzeko", gaineratu du Gasteizko Exekutiboak.