2024ko Tourraren 17. etaparen profila eta ibilbidea: Saint Paul Trois Chateaux-Superdevoluy (177,8 km)

177,8 kilometroko ibilbidea, Saint-Paul-Trois-Chateauxen hasita eta Superdevoluy mendatean amaituta, eta hiru mendate puntuagarri, horietako bat 1. mailakoa, jardunaldiko azken 30 kilometroetan; 2024ko Frantziako Tourraren hamazazpigarren etapako datuak dira horiek. Uztailaren 17an jokatuko dute etapa hori, asteazkenez, 12:35ean abiatuko da, eta antolatzaileen aurreikuspena da irabazleak 16:58tik 17:26ra bitartean zeharkatzea helmuga. Mendiko eguna da, eta igoeran bukatuko da; nolabait, 111. Frantziako Tourreko azken egunetako etapak ikusita, 17. etapa hau atariko bat balitz bezala jo genezake, egun oso gogorrak etorriko baitira. 

Jardunaldiko profilak irteeratik jotzen du gora, eta txirrindulariek azken zatian izango dituzte zailtasun nagusiak. 145,7. kilometroan, Col Bayardeko pankarta izango da. 2. mailako mendatea da hori, 6,8 kilometroko luzera du, eta, batez beste, % 7,3ko malda. Jarraian, 166,6. kilometroan, Col du Noyer iritsiko zaie, 1. mailakoa, eta hori gogorragoa da; 7,5 kilometroko igoera da, % 8,1ekoa. Eta eguna amaitzeko, azken kilometroetan, Superdevoluy igo beharko dute: 3. mailako mendate horrek 3,8 kilometroko ahalegina eskatuko die ziklistei, eta % 5,9ko malda du. Bertan zehaztuko da nor den eguneko garailea.

Tourra oso aurreratuta dabil, dagoeneko, eta garaipena erdiesteko indar handia behar da, bai eta estrategian trebetasuna ere. Noyerren, baliteke sailkapen nagusko lehian dabiltzan gizonek ere aurrerapausoa ematea; asko dago jokoan, besteak beste azken maillot horia, eta aurretik solik beste lau etapa geldituko dira, denak maila eta zailtasun handikoak.

Egunero bezala, EITBk zuzenean emango du lasterketa, eitb.eus-en eta ETB1en bidez; eitb.eus-en, 14:25ean hasiko da emanaldia, eta ETB1en, ordea, 15:00etan.

ETAPAKO PROFILA

16. etapako profila | 18. etapako profila

COL DU NOYERRERAKO IGOERA (1. MAILA)