Sergio Herrera izan da kanporaketako protagonistetako bat. Atezainak Athleticen abagune argienetako batzuk zapuztu ditu. Oso garrantzitsua izan da Osasunarentzat Kopan.

Osasunako zaleek urduritasun handiz bizi izan dute Athleticen aurkako finalerdia, eta amaierara arte eutsi behar izan diote garaipena dastatu eta ospatzeko.

Jagoba Arrasate, partidaren ostean: ''Asko sufritu dugu, amaiera epikoa izan da''

Chimy Avilak soleoan jasaten ari zen minen ondorioz ez zegoen argi finalerdiko itzuliko partidan parte hartuko zuen edo ez; azkenean jokatu du eta bere ama oso hunkituta agertu da partidaren ostean. Bideoa:

Ernesto Valverde: ''Dena egin dugu irabazi ahal izateko''

Osasunak Errege Kopako finala jokatuko du maiatzaren 6an; zale gorritxoek gogo betez ospatu dute.

Pablo Ibañezek 115. minutuan lortu du partida berdintzea eta kanporaketa gorritxoen alde jartzea:

Iñaki Williamsek sartu du kanporaketa berdindu duen gola, lehen zatiko 33. minutuan, Muniainek ateratako eta Vesgak ukitutako korner batean. Bideoa:

Bartzelonak eta Real Madrilek asteazkenean jokatuko dute erabakitzeko bietako zeinek jokatuko duen finala, Osasunaren aurka.

Pablo Ibañezek jaurtiketa bikain hau egin du gol erabakigarria sartzeko:

Pablo Ibañezek, jaurtiketa bikain baten bidez, finalean jarri du Osasuna; talde gorritxoak bere historiako bigarren finala jokatuko du, maiatzaren 6an. 2005ean jokatu zuen aurrenekoa, Betisen aurka.

Amaitu da partida San Mamesen! Osasuna, Kopako finalera!

115. minutua: Osasunaren gola! Pablo Ibañezen gol bikaina!

113. minutua: Urduritasun eta emozio erraldoiak San Mamesen; finalerako txartela, jokoan.

110. minutua: Adu Ares, Sanceten ordez.

Iñaki Williams eta Manu Sanchez, jokaldi batean.

Luzapenaren lehen zatia, amaituta. Athleticek eta Osasunak beste 15 minutu dituzte, eta, markagailuan aldaketarik ez balego, penaltiak egongo lirateke.

Osasunaren aldetik, Pablo Ibañez Aimar Orozen ordez irten da berdegunera.

97. minutua: Zarraga eta Berenguer Nico Williamsen eta Muniainen ordez irten dira.

95. minutua: Vesgaren burukada ona, eta Herrerak, kornerrera

93. minutua: Sancetek txartel horia ikusi du.

Jokoan luzapena! Vivian eta Chimy Avila irten dira zelaira, Yerayren eta Kike Garciaren ordez.

Luzapena! 90 minutuak 1-0ekoarekin amaitu dira, eta kanporaketa berdinduta dago. Osasunak lehen zatia baino gehiago jo du erasora bigarren zatian, baina Athleticek izan ditu aukerarik onenak. Azkenean, beste 30 minutu!

Hiru minutuko luzapena.

85. minutua: Sergio Herrerak bikain aldendu du Raul Garciaren jaurtiketa, eta Nico Williamsek ez du asmatu jarraian.

82. minutua: Manu Sanchez Moi Gomezen ordez zelairatu da.

80. minutua: Raul Garciak Guruzeta ordezkatu du.

Kike Garcia, baloia bereganatzeko lehian.

74. minutua: Txartel horia Kike Barjarentzat.

73. minutua: Sergio Herrerak geldiketa oso ona egin dio Iñigo Martinezi, Athleticen aldeko beste korner batean.

69. minutua: Nico Williamsek aukera oso argia izan du, kontraeraso bikain batean, baina ezkerkada gora joan zaio.

65. minutua: Kike Barjak eta Darko Brasanacek Abde eta Ruben Garcia ordezkatu dituzte.

58. minutua: Yeray ondo sartu da, bigarren zutoinean, korner batean, baina burukada behartuta egin du eta baloia kanpora joan da.

56. minutua: Athleticek eta Osasunak lasaitasun apur bat handiagoa dute bigarren zatiaren hasieran. Athletic pixka bat atzerago dago kokatuta orain.

51. minutua: Athleticek zazpigarren kornerra atera du; Osasunak ez du bat ere atera, oraingoz.

48. minutua: Athleticen eta Osasunaren arteko norgehiagoka, berriro jokoan.

Athleticek jokalari hauek zelairatu ditu:

Hemen da Osasunaren hamaikakoa itzuliko partida honetan:

Iñaki Williamsek jarri du Athletic aurretik; Iker Muniainek oso ondo erdiratu du, eta Mikel Vesgak jo du buruz, baloia area txikian ipintzeko.

Athleticek eta Osasunak erritmo oso biziko lehen zatia jokatu dute. Ernesto Valverderen taldeak gorritxoek baino gehiago kontrolatu dute jokoa, eta saiatu dira Nafarroako taldea atzean sartzen, baina Jagoba Arrasateren gizonak ondo ibili dira atzealdean, eta Agirrezabalaren areara iritsi dira zenbait erasotan. Dena dago erabakitzeke derbian!

Atsedenaldia, San Mamesen: kanporaketa berdinduta dago, Iñaki Williamsen golarekin.

43. minutua: Torrok falta egin dio Sanceti, eta txartel horia atera dio epaileak.

39. minutua: Iñaki Williamsek berriro bidali du sareetara, baina jokoz kanpo zegoen, argi, eta jokaldiak ez du balio.

37. minutua: Aukera ona Osasunarentzat; Kike Garciak gertutik errematatu du, eta Agirrezabalak ondo gelditu du.

33. minutua: Athleticen gola! Iñaki Williamsek sartu du! Kornerbat baliatuz bidali sareetara aurrelariak.

Ernesto Valverde eta Jagoba Arrasate, elkarrekin partida hasi baino lehen.

24. minutua: Iñaki Williamsek area ertzetik jaurti, eta baloia zutionetik gertu irten da.

Sergio Herrera fin ibili da, 7. minutuan, Guruzetaren aurrean.

19. minutua: Mikel Vesgak falta egin dio Aimar Orozi, eta partidako lehen txartel horia atera diote.

15. minutua: bi taldeak oso bizi ari dira jokatzen.

San Mames erabat bete da Kopako derbi erabakigarri honetarako.

7. minutua: Guruzetak, area barruan, erregatea egin du, pase sakona jasota, eta Herrerak geldiketa ona egin du.

5. minutua: Kike Garciak kanpora errematatu du, area barruan, behartuta.

Hasi da partida San Mamesen! Athleticek egin du sakea.

Giro ikusgarria San Mamesen! Jokalariak, zelairatzeko prest.

Athleticen eta Osasunaren arteko finalerdiaren harira, Jose Angel Iribar elkarrizketatzeko aukera izan dute "Biba Zuek" saioan. Bideoa:

Bideo honetan dago jasota Osasunaren autobusa San Mamesera iritsi den unea:

Athletic jokalari hauekin zelairatuko da: Agirrezabala; De Marcos, Yeray, Iñigo Martinez, Yuri; Vesga, Sancet; Iñaki Williams, Muniain, Nico Williams; Guruzeta.

Hona hemen Osasunaren hamaikakoa: Sergio Herrera; Moncayola, Aridane, David Garcia, Juan Cruz; Torró; Ruben Garcia, Aimar, Moi Gomez, Abde; Kike Garcia.

Osasuna atzerapenarekin iritsi da San Mamesera, Ertzaintzak atxiki ostean; handik gutxira, talde nafarrak San Mamesen bilera bat egin duela baieztatu du, eta bertan partida 10 minutu atzeratuko dela eta 21:10ean hasiko dela erabaki da.

Athleticen, Ander Herrera deialditik at geratu da, azkenean; Osasunaren aldetik, Chimy Avilak ordezkoen aulkian hasiko du partida.

Osasunak eskatu dio Espainiako Futbol Federazioari partida 15 minutu beranduago hasteko.

Milaka lagun kolorea ematen ari zaizkie Bilboko kaleei partida jokatu aurretik; bideoa:

Aurki jakingo dugu hamaikakoak zeintzuk diren.

Ikusmina erraldoia da San Mameseko inguruan. Ordu bat eta erdi baino apur bat gehiago partida hasteko.

Nola daude Athletic eta Osasuna zaleen animoak partidaren aurretiko orduetan? Ikus dezagun hemen:

Athleticeko eta Osasunako zaleak hasiak dira kaleak girotzen

Atzo, gaueko partidaren bezperan, Indar Gorri eta Herri Harmaila taldeetako kideak Sadarrera eta Lezamara hurbildu ziren, hurrenez hurren, Osasunako eta Athleticeko jokalariak animatzeko, azken entrenamenduetan. Bideo honetan dago jasota.

Ernesto Valverde Athleticeko entrenatzaileak, bere aldetik, adierazi du bere taldeak "bihotzarekin eta buruarekin" jokatzen jakin behar duela.

Jagoba Arrasate Osasunako entrenatzailearen esanetan, bere taldeak ''saiatzeko beharra" du eta finalera sailkatzea "lortzeko ilusioa''. Hemen bideoa:

Itzuliko partidaren atariko honetan, aztertu dugu zein puntutan dauden bi taldeak eta neurketaren gaineko xehetasun guztien berri ematen dizugu.

Athleticek eta Osasunak Kopako finalerako txartela dute jokoan San Mamesen, gau erabakigarrian

Gaur da egun seinalatua. Athleticek eta Osasunak elkarren aurka jokatuko dute Errege Kopako finalerdietako itzulerako partida, maiatzaren 6ko finalean egoteko ilusioarekin. EITBk jarraipen berezia egingo dio kanporaketari, eta, besteak beste, partida zuzenean eskainiko du ETB1en 21:00etatik aurrera.