Arte eszenikoen sortzaile berriak, ACT 2010 jaialdian

Datorren asteartean, ekainaren 1ean, hasiko da ACT2010, Nazioarteko Eszena Sortzaile Berrien Jaialdiaren zazpigarren edizioa. Hilaren 5a arte, arte eszenikoetan aritzen diren mundu osoko 100 artista gazteren topaleku izango dira Bilbo eta Barakaldo. Bost eszenatokitan egingo dira emanaldiak: Barakaldo Antzokian, Bilborock aretoan, Kafe Antzokian, BBK Aretoan eta La Fundicion Aretoan egingo dira emanaldiak. Lehiaketak eta erakusketa ikuskizunak izango dira, beste behin ere, jaialdiaren oinarriak.

Dantza, bideo-dantza, pieza laburrak, bideo sormena eta sortzaile berrien lan artistikoak dira jaialdi honen osagaietako batzuk. Barakaldon hasiko da aurtengo edizioa ACT 09ko dantza irabazlearekin (Sigridur Soffia Nielssdotir artistaren Uniform Sierra lanarekin). Joan den urtean antzerki mailan gailendu zen Los jovenes no saben lo que es llorar ni pasarse la vida corriendo pieza ere izango da ikusgai hasiera ekitaldi horretan.

Pieza laburrak lehiaketan

Aurtengo edizioan 17 pieza labur izango ditugu lehiaketan. Tendentzia berriak jorratzen dituzten artista azaleratu berrien lanak biltzen ditu katalogoak. Korea, Iran, Kosovo, Suitza, Italia, Israel, Herbehereak edo Erresuma Batuak bezalako herrialdetako lanak izango dira ikusgai. 3.000 eutotako saria irabazteko aukera izango dute.

Dantzine

Bideosormen atal honetan 13 film ibiliko dira lehian Dantzine saria irabazteko, eta 1.500 euro jasoko ditu lan irabazleak. Gainera, bideodantza lehiaketa bat ere badu jaialdiak, 1.500 euroko sariarekin hemen ere.

ReACT

Ekainaren 13rik aurrera Basaurira egingo dute salto bideo sortzaileek. Bertan ReACT egingo dute, dagoeneko ''''anaia txikia'''' bihurtu den ACTjaialdiaren luzapena eta artisten topaleku berezia. Dantza, bideoa eta tendentzia berrietako lanak bertan aurkeztu eta elkarrekin harremanetan jartzeko aukera eskainiko die bigarren jaialdi txikiago honek. ACT 2010 ekimeneko lanik onenak izango dira Basaurin ikusgai.