Umore Azokak 50 konpainia inguru eta 18 estreinaldi jasoko ditu

Lau egunetan Leioak Kaleko Artisten Azokaren hamabigarren edizioa jasoko du eta espazio publikoak ametsez, ilusioz, irrikaz eta umorez beteko ditu. Artistek ikusentzuleak liluratuko dituzte zirko, dantza, clowna, antzerki edota txotxongiloekin.

Aurten Umore Azokak 12 euskal talde, Estatuko 21 talde eta nazioarteko 13 jasoko ditu, guztira 46 konpainia. Lau egunetan beraz, 50 ikuskizun ezberdin eta 150 emankizun ezagutu ahal izango dira, horietarik 18 estreinaldian. Guzti honek hitzordu ekidiezina bihurtzen du Leioako Azoka, bai profesionalentzako (nazioarteko 150 programatzailetik gorak eman dute izena, Europako jaialdi erraldoietako zuzendari eta abarrek), bai kale antzerki zaleentzako.

Aurrenekoz ikusi ahal izango diren ikuskizunen artean, 12 euskal konpainien lanak daude, zortzi Estatuko taldeenak eta bat nazioartekoa da -beste bederatzi Estatuko aurkezpenak izango dira-.

Kaleko arteak begipuntuan, Umore Azokak artista hasiberriei tokia egiten die, beraien sorkuntzak plazan erakutsi ditzaten. Eskarmentu eta gaztetasun horri esker freskotasuna mantentzen du Umore Azokak. Gainera Azokak bertan aurkeztuko diren lau lanen ekoizpenean ere parte hartu du, sorkuntzarekin lotura baitu.

Antzeztuko diren lanez gain, Umore Azokak egitarau osagarri mardula dakar. Nabarmentzeko moduak dira "La Codorniz 70 años. Humor, sociedad y censura" erakusketa eta larunbatean jokatuko den Argazki Maratoia batetik, eta Artekale topaketak (kaleko arteen profesionalentzako) zein Sarearen bilera (Euskadiko Antzokien Sarea) bestetik. Bukatzeko, ostiralean izango den Sari Banaketa azpimarratuko dugu, iaz jaialdian nabarmendu ziren ikuskizunak goraipatuko baititu. Nacho Vilar Producciones/Gaupasa Produccionesen "Habitus mundi" lanak Euskadiko Lanik Onenari Saria jasoko du, eta Circ Atemporen "Atempo Circ" lanak Euskadiz Kanpoko Lanik Onenaren Saria.