Guggenheim: 14 urte munduko arkitekturaren ikono bezala

Gaur bezalako egun batez, baina duela 14 urte, ireki zituen ateak Bilboko Guggenheim Museoak. Mundu zabaleko arkitektura eredutzat jotzen denak milioi bat ikusle hartu ditu urtero.

Bi heren atzerritarrak, eta %80tik gora Euskaditik kanpokoak. Eta krisi-urte honetan, ikusleen kopurua uste baino %6 handiagoa da. 14 milioi lagunek bisitatu dute Bilboko Guggenheim Museoa.

Frank Gheryren lanaren eraikitze prozesua txundigarria izan bazen, Juan Ignacio Vidarte gaztearen zirrara agerikoa zen 1997ko urriaren 19 hartan. New Yorkeko Guggenheim Fundazioaren duen erlazioa dela eta kritika zorrotzak jaso zituen bere garaian, baina aurre egin zien eta Bilbo Efektua delakoaren espoleta izan da, apostu arriskatua krisi garaietan.

Instituzio publiko eta pribatuen inplikazioarekin batera, arrakastaren gakoa programazio artistikoa izan omen da. Europan beste Guggenheim izateko apostua egin dute hainbat hirik, baina Bilbo hiriaren baiezkoa behar dute eta Helsinkik soilik omen du aukeraren bat.

Zabalkundearen beste alderdi bat Urdaibain izan daiteke, baina geldirik dago instituzioen akordio ezagatik. Gainera, 2014an New Yorkeko fundazioarekin duten akordioa berritzea edo ez aztertzen ari dira.