Jorge Oteiza izango da 41. Bertso Egunaren ardatz nagusia

Urtero bezala, Bertso Eguna ospatuko dute urtarrilaren 30ean Donostiako Kursaal Auditorioan. Donostia Festak erakundeak eta Euskal Herriko Bertsozale Elkarteak antolatu ohi dute urtero ekitaldia, Donostia Egunaren inguruan. Bertsozale Elkarteko ordezkari gisa Andoni Egaña izan da gaur goizean egin duten aurkezpenean, Donostiako Udaleko Kultura eta Gazteria zinegotzi Denis Itxaso eta Kutxako ordezkari Mikel Irizarrekin batera.

Bertan jakitera eman dutenez, aurtengo edizioan Jorge Oteiza artista izango da ardatz nagusia, arratsaldeko 18:00etan Kursaal Aretoan egingo den Hustubetehustu ekitaldian. Ez zaio, ordea, omenaldi kutsurik eman nahi festari. Bere ideiak eta ateraldiak oholtza gainean frogak egiteko baliatu nahi dituzte bertsolariek: ''''Oteizaren esaerak, izaera, esaldiak… gurera ekarri, moldatu eta probatu'''', esan dute antolakuntzatik.

Andoni Egaña eta Unai Elizasu izango dira saioaren gidariak eta hemeretzi bertsolari izango dira kantuan. Zortzi bertsolarik ardaztuko dute saioa: Igor Elortzak, Iñaki Gurrutxagak, Uxue Alberdik, Xabier Silveirak, Jon Maiak, Jokin Sorozabalek, Amets Arzallusek eta Maialen Lujanbiok. Beste hamar-hamaika bertsolari gonbidatu ere izango dira oholtza gainean, ariketa batean kantatzera igoko direnak.

Arratsaldeko ekitaldiaz gain, izango da bai zerekin gozatu egun guztian zehar. Goizeko 12:00etatik aurrera bertsolariak kantuan izango dira Bulebarrean eta Alde Zaharrean eta hiru bertsolari bikote izango dira teman bazkalordurarte. Arratsaldeko 18:00etan hasiko da Hustubetehustu ekitaldia Kursaaleko Areto Nagusian; eta 21:00etan, berriz, afariaz eta festaz gozatzeko aukera proposatzen dute antolatzaileek Kursaal jatetxean.

Ekitaldirako eta afarirako sarrerak salgai daude www.bertsosarrerak.eu &' || 'nbsp;web gunean.