Aurrerapena
Ibaeta, Legutio, Getxo, Irurita, Irun eta Izpurako bertsoak HHn
Redacción
Beñat eta Unai Gaztelumendi Andoni Egañarekin, librean, Ibaetako Aingeru Goardakoaren ermitan. Nafarroako txapelketa eta Joxe Agirreren puntu erantzunak 1981eko filmazio batean.
Pasiera gozoa -apenas hamar minutuko ibilia- dago Gaztelumenditarren etxetik Ibaetako Aingeru Zaindariaren ermitara. Dozena erdi urte-edo daramatzate Beñatek eta Unaik bertako festa egunean bertso-kantatzen Andoni Egaña eta Sebastian Lizasorekin. Etxetik ermitarainoko bidea berriketan egin zuten Añorgako anaia gazteek eta Amaia Uribek.
Legution urtero eguberri inguruan egin ohi duten bertso saioa beranduxeago heldu da aurten, baina ederra atera da. Bertso jaialdian bitxiak jarri zizkieten Onintza Enbeitari, Jexux Mari Irazuri, Aitor Mendiluzeri eta Manex Agirreri. Ondo bete zuten euren lana bertsoaldi ederrak josiz.
Saio "underground"agoa ere grabatu dute HHko kamerek, Irulegiko Irratiaren aldeko festan Hudaltzainek Izpuran egindakoa; Bob Marleyren doinua baliatuz, bertan zen Erramun Martikorenari "Erramun no cry" kantatuz. Datorren astean emango dute han jasotako gehiena baina aperitifa erakutsiko dute asteon.
Nafarroako Txapelketak Iruritan izan du bigarren finalerdia eta bertan bildutakotik ere emango dute. Xabier Legarreta "Arano"k jaso zuen puntu gehien eta sailkatu da finalerako. Julen Zelaieta eta Iñaki Alemanen bertsoak ere sartu dituzte kronikan.
Bertsozaleek bidalitako bideo pare bat ere erakutsiko dute asteon. Batetik Abra sariketa, Jone Uria eta Ane Labaka izan dira txapeldun eta txapeldunorde eta biek egindako ofizioa eskainiko dute. Bestetik Irungo Hazia elkartean Manu Goiogana, Amets Arzallus eta Jokin Urangarekin izandako bertso afariko bertsoaldi bizi bat ere erakutsiko dute.
Ohiko ataletak ere bai: zuri-beltzekoan Nikolas Zendoia karteralapur bati kantuan, eta artxiboko errepasoan 1981eko Bertsolari Eguneko pieza: Joxe Agirreren lau puntu-erantzun antologiko... lantaldeak hamaika aldiz ikusi ditu Joxeren puntu-erantzun horiek eta ikustaldi bakoitzean harritzen da. Den-dena ondo atonduta ostegunean 22:00etan ETB3n; igande bazkalostean, 15:00etan, ETB1en; eta noizgura www.eitb.comen.