Beterriko txapelketako saio xelebrea, Hitzetik Hortzeran

Euskal Herriko Unibertsitatean Antropologia irakasten du Jone Miren Hernandezek eta Bertsozale Elkarteak antolatutako Umorez jardunaldietan parte hartu berri du. Generoa eta bertsolaritza dira jardunaldi horien gaia eta ikuspegi horrexetatik abiatuta, hasieratik bertatik, arreta, jakinmina, eta ilusioa piztu dituen proiektu mardula abiatu du Lasarten jaiotako ikerlariak. Bera izango du asteon ondoan Jon Artanok.

Beterriko Txapelketan: sevillanak eta behitsolariak

Bertso neurketa xelebrea geratu zen Andoaingo Ontza elkartean. Aurrez aurre Donelutxi taldeko gazteak -Uxue Alberdi, Ainhoa Agirreazaldegi eta Onintza Enbeita- sevillanaz jantzita, eta Ageda Deuna taldeko gazteagoak -Jone Uria, Alaia Martin eta Miren Amuriza- ''behitsolari'' mozorrotuta. Beterriko txapelketan ohitura denez talde biek etxetik prestatuta ekarri zuten show bana aurkezpenerako: sevillanek Lola Flores, Rocio Jurado eta Azucar Moreno omendu zituzten; behitsolariek berriz santa eskean ekin zioten saioari. Aurkezpenen ostean ere Alaitz Sarasola gaijartzaileak eman zien zeregin berezirik. Saioa ikaragarri dibertigarria atera zen, eta elkartea mukuru bete zuten zaleak pozarren atera ziren. Bestalde Sebastian Lizasok eta Iker Zubeldiak Zeraingo Oiarte sagardotegian osatutako saio zirtolariko bertsoaldiren bat ere erakutsiko dute aste honetako saioan. Eta berriki kaleratuko den Bertsolari aldizkariaren edukiak ere azalduko dituzte.

Mattinen ateraldiak Lazkao Txikik kontatuak

Zapping-a 1986an Joxe Mari Iriondok aurkezten zuen Aurrez aurre saioko ale bikain bateko txatalekin osatu dute. Orduko hartan Mari Treku izan zuen gonbidatu eta Mattin izan zuten biek hizpide. Gainera propio grabatutako bideo batean Lazkao Txiki ere agertu zen Ahetzeko bertsolariaren pasadizoak kontatuz. Zuri-Beltzekoan, berriz, Uztapide kantari, 1974ko martxoan Azpeitian egindako saio batean.

Igandean, 21:00etan, etb1n. Eta, oso-osorik, lehenagotik ikusgai eitb.comen.