Hitzarmena
Nafarroako Gobernuak Euskaltzaindiaren mendeurrena babestuko du
eitb.eus
Nafarroako Gobernuak eta Akademiak 2018ko lankidetza hitzarmena sinatu dute. Gobernuak hainbat ekimen diruz lagunduko ditu, eta bi aldeek elkarlanean jarraitzeko borondatea erakutsi dute.
Ana Ollo kontseilaria eta Andres Urrutia euskaltzainburua, sinatze ekitaldian
Gaur goizean, Ana Ollo Nafarroako Gobernuko Herritarrekiko eta Erakundeekiko Harremanetako kontseilariak eta Andres Urrutia euskaltzainburuak Nafarroako Gobernuaren 169.000 euroko ekarpena jasotzen duen hitzarmena sinatu dute.
Gobernuak emandako laguntzarekin, proiektu hauek bultzatuko dira aurten: La Vasconia peninsular en las fuentes árabes ikerlana; Joakin Lizarragaren lexikoa aztertzeko egitasmoa; Euskal Corpus Onomastikoa egitasmoa; eta Onomastika eta Toponimia lanak.
Horrez gain, irailean Baionako jardunaldiarekin abiatuko den Mendeurrena ere babestuko du Nafarroako Gobernuak. "Mendeurrenaren atarian gauden honetan, berebiziko garrantzia du hitzarmenak, Nafarroako Gobernuak bere babesa erakusten diolako Euskaltzaindiari, beste behin; eta, horrekin batera, elkarlanean jarraitzeko borondatea", azaldu du Andres Urrutia euskaltzainburuak.