Mendeurrena
Euskara batuak Ipar Euskal Herrian dituen erronkak ditu aztergai Euskaltzaindiak
eitb.eus
Akademiak, gainera, 'hitzarmen garrantzitsua' izenpetu du Euskal Hirigune Elkargoarekin. Jarraitu zuzenean "Euskara batua eta Ipar Euskal Herria" jardunaldia.
Mendeurreneko ekitaldien barruan, estreinako jardunaldi akademikoa egingo du Euskaltzaindiak gaur, Baionako Herriko Etxean (‘Euskara batua eta Ipar Euskal Herria: 1964-2018’), 09:00etan hasita. Guztira, bederatzi ekitaldi akademiko antolatuko dira 2019ko urria bitarte.
Baionako jardunaldiak helburu bikoitza du, Jean-Baptiste Coyos euskaltzain eta jardunaldiko koordinatzaileak jakinarazi duenez: "60ko hamarkadaren hasieran hainbat bilkura egin ziren euskara batuaren oinarriak lantzeko, horietako batzuk Baionan; bilkura horien ekarpen nagusiak azpimarratu nahi genituzke biharko kolokioan. Eta, aurrera begira, Ipar Euskal Herritik begiratuta, euskara batuak dituen erronkak ere identifikatu nahi genituzke".
16:30 arte, parte hartuko dute: Jean-Rene Etxegaraik; Andres Urrutiak; Beñat Arrabitek; Txomin Peillenek; Jean-Louis Davantek; Eneko Irigaraik; Gexan Alfarok; Janbattitt Dirassarrek; Joseba Intxaustik; Jean-Baptiste Coyosek; Itxaro Bordak; Peio Jorajuriak; Jose Luis Aizpuruk; Aines Dufauk; Joseba Garaik; Naroa Gorostiagak; Xarles Videgainek; eta Sagrario Alemanek.