Eusko Ikaskuntzak Agosti Xaho idazle zuberotarra omendu du

Eusko Ikaskuntzak Agosti Xaho kazetari, politikari eta "jenio erromantikoaren" omenezko jardunaldi bat antolatu du larunbat honetarako, Baionako Euskal Museoan, bere jaiotzaren 200. urteurrena dela eta, erakundeko iturriek jakinarazi dutenez.

Agosti Xaho Lagarde Atharratze herrian (Zuberoa) jaio zen, 1811ko urriaren 10ean. Euskal kazetari, idazle, hizkuntzalari eta politikaria izan zen, eta haren pentsamoldea ''ezkerreko euskal nazionalismo baten lehen aurrekaritzat'' hartzen dute askok. Euskaldunen jatorriaren eta historiaren inguruko hainbat kontakizunen asmatzailea izan zen, tartean 'Aitorren elezaharra'.

Hamar hizlarik Atharratzeko jenioaren izaera aberatsaren alderdi anitzak landu dituzte, hain zuzen ere, Xabier Zabaltzak, Battittu Coyosek, Xipri Arbelbidek, Fermin Arkotxak, Xabier Ezeizabarrenak, Joseph Zabalok, Elisabete Zubillagak, Marie-Andree Ouretek eta Jean-Claude Larrondek. 09:00etan hasita, 18:00ak arte, egun osoko jardunaldia prestatu zuten. Halaber, sarrera doakoa izan da.

Biografia, kalean

Xahoren jaiotzaren 200. urtemuga ospatzeko, Eusko Jaurlaritzako Kultura Sailak idazle zuberotarraren biografia aurkeztu du astearte honetan, Hendaiako Abadia Gazteluan. Xabier Zabaltza historialari nafarrak idatzi du lana.

Xabier Zabaltza lanaren egileak argitu duenez, ''liburu hau biografia bat baino gehiago, ideografia bat da. Izan ere, saiatu naiz Agosti Xahoren ideologiako kontu garrantzitsu batzuk azaltzen, polemikoak izan daitezkeenak. Ideologia hori oso korapilatsua da, baina, barne-batasun handia du bere baitan''.

Xahori buruzko argitalpen hau ez da salgai jarriko, eta liburutegietan, ikastetxeetan eta unibertsitateetan banatuko da. Dena den, Bidegileak bildumako gainerako argitalpenen moduan, Xahori buruzko biografia Interneten topatu ahal izango da.