Musika klasikoa eta egungo doinuak, Gasteizko Bernaola Bero jaialdian

Bernaola Bero Festival musika jaialdia egingo dute Gasteizen abuztuaren 13tik irailaren 9ra bitartean. Arabako Foru Aldundiak antolatuta, ''''antzinako musika, doinu klasikoak eta egungo musika proposamenak'''' izango ditugu entzungai egun horietan. Hamar bat hitzordu izango dira, tartean organo kontzertuak.

Arabako Foru Aldundiak adierazi duenez, proposamenak asko izango dira, baina oinarria berdina izango da kasu guztietan: ''''musika jasoa''''. Organo zikloaren XXV. edizioa egingo da jaialdi honen baitan ere. Arabako organo historikoen eskutik, ''''instrumentu honek emandako errepertorio luzeaz gozatzeko aukera izango dute zaleek'''', arduradunek gogoratu dutenez.

Musika jasoaren atalean, Pergolesiren ''Stabat Mater'' lana azpimarratu dute antolatzaileek. ''''Musika barrokoaren barruan pieza kuttuna da'''', gogoratu dute. Egungo musikaz gozatzeko Sinkro Ensemble taldea izango da jaialdian, musika eta dantza uztartuko dituen proposamen berezi batekin.

Kontzertuak Arabako leku berezietan egingo dira: Arabar Errioxako Parrokiak, Gasteizko Santa Maria katedrala edo Añanako Gatz Harana, besteak beste.

Antonio Cabezon konpositore eta organistak toki nabarmena izango du aurtengo programan, Arabako organo munduaren ondareari egindako ekarpena eskertu eta bere jaiotzaren 500.urteurrena ospatzeko. Gainera, Zuriñe Gerenabarrena Gasteizko konpositoreak azken lana estreinatuko du, aurrerantzean Katedraleko Artxiboan egongo den pieza.