Heriotza
Quincy Jones konpositore eta ekoizlea zendu da
N. V. | EITB Media
91 urte zituela hil da Jones, besteak beste "Thriller" eta "Bad" Michael Jacksonen diskoak eta "We are the world" kantuaren ekoizlea. Tony Bennet, Sarah Vaughan, Frank Sinatra eta Ray Charles artistekin ere lan egin zuen.
91 urte zituela hil da Jones, Kalifornian
Quincy Jones musika konpositore eta ekoizlea (Chicago, 1933), besteak beste Thriller Michael Jacksonen disko arrakastatsua ekoitzi zuen musikaria, hil da Bel Airren, Kalifornian, 91 urte zituela, haren ordezkariak CNN kateari jakinarazi dionez.
"Gaur gauean, bihotza apurtuta baina beterik, Quincy Jones anaia eta aita hil zela iragarri behar dizuegu. Bere musikaren eta maitasun mugagabeari esker, Quincy Jonesen bihotza betiko egingo du taupa", esan du familiak agiri batean.
Quincy Jonesek Off the Wall (1979), Thriller (1982) eta Bad (1987) Michael Jacksonen diskoetan parte hartu zuen. Inoizko ekoizlerik handienetakoa izan da, eta, besteak beste, Jacksonekin berarekin, Aretha Franklinekin, Miles Davisekin, Frank Sinatrarekin, Sarah Vaughanekin eta Ray Charlesekin lan egin zuen.