KONTZERTUA
Bryan Adamsek Nafarroa Arenan joko du 2025eko ekainaren 6an
AGENTZIAK | EITB MEDIA
Iruñeko kontzerturako sarrerak abenduaren 3an, asteartean, jarriko dira salgai, 11:00etan, entradas.com eta doctormusic.com webguneetan.
Bryan Adamsen kontzertu baten artxiboko irudia. Argazkia: EFE
Bryan Adams abeslari kanadarra Nafarroa Arenan izango da 2025ean. Artista ezagunak 2025eko ekainaren 6an joko du Iruñeko pabiloian, "Roll With The Punches 2025" bira berriaren baitan.
Adams Barakaldoko BECen izan berri da. Azaroaren 15ean aretoa bete zuen 'So Happy It Hurts Tour' birarekin. Otsailean salgai jarri bezain laster agortu zituen sarrera guztiak.
Datorren urtean bost kontzertu eskainiko ditu kanadarrak Espainiako Estatuan: urtarrilaren 16an Sevillan, 19an Valentzian, ekainaren 4an Alacanten, 6an Iruñean eta ekainaren 10ean Malagan.
Navarra Arenako kontzerturako sarrerak abenduaren 3an, asteartea, jarriko dira salgai entradas.com eta doctormusic.com webguneetan, 11:00etan.
Lau hamarkada baino gehiagoko ibilbide arrakastatsua du Bryan Adamsek eta bira handik egin izan ditu. Rockaren erreferentziatzat dute askok eta mirestuak dira bere zuzenekoak.
17 disko kaleratu ditu. Azkena, Bryan Adams Live At The Royal Albert Hall 2024 albuma da.
Konpositore gisa, sari eta aintzatespen ugari jaso ditu, besteak beste, Oscarretarako hiru izendapen, Urrezko Globorako bost izendapen, Grammy sari bat eta 20 Juno Awards.