146 DAUDE GUZTIRA
Euskaltzaindiak 14 euskaltzain urgazle izendatu ditu
Erredakzioa
Otsailaren 22an, ostiralarekin, Euskaltzaindiak 14 euskaltzain urgazle berri izendatu zituen, Bilbon, osoko bilkura batean. 146 euskaltzain urgazle ditu guztira hizkuntzaren akademiak egun.
Euskaltzaindia
Euskaltzaindiak aldiro-aldiro izendatzen ditu euskaltzain urgazle berriak, euskaltzain oso, emeritu eta ohorezkoekin batera euskararen akademia osatzen duten kideak. 2006ko maiatzean izendatu zituen azken aldiz urgazle berriak; esparru ezberdinetako (zientzia, hizkuntzalaritza, irakaskuntza, kazetaritza...) 35 pertsona aukeratu zituzten orduko horretan, eginkizun berrirako.
Oraingo honetan, dagoeneko akademiaren batzorde akademikoetan lanean ari diren pertsonak hautatu dituzte. Gutxienez 2005. urtetik ari dira guztiak batzorde horietan beharrean.
Hauek dira euskaltzain urgazle berriak: Iñaki Aldekoa, Kaxildo Alkorta, Iñaki Amundarain, Nagore Etxebarria, Beatriz Fernandez, Juan Garzia, Antton Gurrutxaga, Patxi Juaristi, Gerardo Luzuriaga, Elena Martinez de Madina, Felix Mugurutza, Manu Ormazabal, Erramun Osa eta Iratxe Retolaza.
Gaur egun, 146 euskaltzain urgazle ditu Euskaltzaindiak.