Elhuyarrek Hiztegi Automatikoak atari berria aurkeztu du

Elhuyarrek automatikoki sortutako bost hiztegi biltzen dituen Hiztegi Automatikoak ataria sortu du, eta erabiltzaileen esku jarri du sarean CC-by-sa lizentziapean. Hiztegi horiek alemanarekin, hindiarekin, arabierarekin, txinerarekin eta swahiliarekin lotzen dute euskara, hizkuntza teknologiez baliatuta. Kasu guztietan, ingelesa erabili da zubi-lanak egiteko eta, ondorioz, bost hiztegi elebidun horiek sortzeko.

Hizkuntzen aukeraketa ez da kasualitatea izan, kontuan hartu baita, besteak beste, hizkuntza horiek biltzen duten hiztun kopurua handia izatea, kontinente desberdinetan hitz egiten diren hizkuntzak jasotzea, eta existitzen ez ziren euskarazko hiztegi elebidunak sortzea.

Proiektu hau astearte honetan aurkeztu dute Josu Aztiria Elhuyar Hizkuntza eta Teknologia unitateko arduradunak eta Iker Manterola I+G unitateko ikertzaileak, Donostiako Koldo Mitxelena Kulturunean.

Elhuyarrek hizkuntza teknologietan egiten duen ikerketaren emaitza da Hiztegi Automatikoak ataria, eta gaur egun euskara aipatutako hizkuntzekin elkartzen baditu ere, "beste hizkuntza-bikote batzuk jasotzen dituzten hiztegi automatikoak ere sor daitezke", Josu Aztiriak adierazi duenez. "Aurrera begira, aurreikusia dugu euskara beste hizkuntza batzuekin elkartzea eta atari honetan eskuragarri jartzea erabiltzaileentzat", gaineratu du.

Bestalde, hiztegiak automatikoki sortu direnez, ez dira erabat zuzenak. Hori dela eta, Elhuyarrek erabiltzaileei aukera eskaintzen die atarian bertan "zuzenketak proposatzeko", Iker Manterolak azaldu duenez, eta, hala, hiztegi-erabiltzaileen komunitate aktibo bat sortzeko. Proiektuak Eusko Jaurlaritzaren Hizkuntza Politikarako Sailburuordetzaren laguntza jaso du.