Kursaaleko aulkien % 90 bete dira aurten Hamabostaldian

Donostiako Musika Hamabostaldiaren 75. edizioa azken txanpan sartuta da dagoeneko. Hamabostaldia igandean amaituko bada ere, behin-behineko datuen arabera, Kursaal auditorioan egin diren ekitaldietan okupazioa % 90ekoa izan da, eta diru-bilketa 900.000 eurokoa izan da, iaz baino 30.000 euro gehiago.

Budapesteko Orkestrak emango dio amaiera 2014ko Musika Hamabostaldiari. Aipaturiko orkestrak bi kontzertu eskainiko ditu gaur biharretan eta kontzertu horrek emango dio amaiera 75. edizioari. Aurten, guztira 70 ekitalditik gora izan dira.

Aurtengo edizioko azken ekitaldia jai usainean egingo da eta besteak beste balsak, polkak, Hungariako abestiak eta kanta tradizionalak entzun ahal izango dira.

Musika Hamabostaldiaren erdigunea Kursaal auditorioa izan da eta guztira sei alditan bete dira bertako eserlekuak. Bestalde, Musika Hamabostaldiko ekitaldiak Gipuzkoako beste hainbat txokotan ere ikusi ahal izan dira, esaterako Arantzazun.

2015eko programazioa

Antolakuntzak ohar baten bidez jakinarazi duenez, dagoeneko datorren urteko Musika Hamabostaldia prestatzen hasia da, eta San Petersburgoko Orkestra Filarmonikoa Donostian izango dela iragarri du. Halaber, Giuseppe Verdiren opera bat taularatzea ere aurreikusten dute.