Mazedonia, Ekuador, Serbia, Txile eta Hegoafrika, Portugaleten

Mazedoniako, Ekuadorko, Serbiako, Hegoafrikako eta Txileko bost taldek eta Elai Alai Kultur Elkarteak parte hartuko dute Portugaleteko Nazioarteko Folklore Jaialdiaren 42. edizioan, Bizkaiko herri horretan, uztailaren 18tik 24ra. Topaldia heltzeko “irrikan” zegoen jendea, antolatzaileen esanetan, eta “kultura ezberdinetako pertsonen arteko harremanak” errazten dituen “kultura eta gizarte konpromisoa” dela uste dute.

Aurten, talde hauek hartuko dute parte bertan: Bafote (Txile), Ballet Cuadanacunchic (Ekuador), Orce Nikolov (Mazedonia), Themba Njilo (Hegoafrika) eta Kud Cvetkovic (Serbia). Elai Alai Portugaleteko taldeak gonbidatuta bertaratu dira horiek guztiak Bizkaira.

Lorea Bilbao Bizkaiko Aldundiko Kultura diputatuaren hitzetan, “kalitatea, turistentzako interesa, desberdintasuna, berrikuntza eta herri kulturen eta herritarren arteko lotura” ematen dizkio jaialdiak Euskadiri.

Bestalde, Gaizka Benguria Elai Alai Kultur Elkarteko presidentearen ustez, “dantza eta musika, mintzaira komunak, erabiliz esperientziak partekatzen dira jaialdian, Euskal Herrian folklorea atsegin dugulako; sentiberatasun horrek beste toki askotako kultura tradizionalak ere biltzen ditu, estiloa, mezua eta janzkera bera gorabehera”.

Programa

Uztailak 18, 21:30. Portugaleteko Nazioarteko Folklore Jaialdiaren aurkezpena. Canilla pasealekuan.

Uztailak 19, 21:30. Portugaleteko Nazioarteko Folklore Jaialdiaren bigarren jardunaldia. Canilla pasealekuan: Euskadi eta Serbia.

Uztailak 20, 21:30. Portugaleteko Nazioarteko Folklore Jaialdiaren bigarren jardunaldia. Canilla pasealekuan: Txile eta Hegoafrika.

Uztailak 21, 21:30. Portugaleteko Nazioarteko Folklore Jaialdiaren hirugarren jardunaldia. Canilla pasealekuan: Mazedonia eta Euskadi.

Uztailak 23, 19:00. Nazioarteko musika. Puente Colgante hotela. Txile, Serbia eta Hegoafrika.

Uztailak 24, 13:00. Nazioarteko musika. Puente Colgante hotela. Ekuador, Euskadi eta Mazedonia.

Horrez gain, jaialdian parte hartuko duten taldeek EAEko beste hainbat udalerri bisitatuko dituzte, hala nola Getxo (uztailak 20 eta 22), Bergara (21) Erandio (21), Durango (22), Irun (29) eta Gueñes (30).