Kontzertu txikiak babestearen aldeko deia egin dute

Eusko Jaurlaritzaren Gobernu Bilerak jendaurreko ikuskizunen eta jolas-jardueren lehenengo erregelamendua onartu zuen otsailaren 5ean, “ikuskizun eta jardueretan pertsonen segurtasuna bermatzeko, erabiltzaileen eta gainerako herritarren eskubideak errespetatzeko eta aisiarako eskubidea eta herritarrek dituzten gainerako eskubideak era baketsuan bateratzeko”. 

Idatzi horri jarraituta, baina, “taberna batek ere ezingo du antolatu hilean ikuskizun bat baino gehiago edo urtebetean 12 baino gehiago”, Arteak Ireki plataformak azaldu duenez, eta, horren aurrean, protesta deitu du talde horrek Eusko Jaurlaritzak onartutako testuak “ekosistema kulturalari eta hastapenetan dauden taldeei” erasotzen dielakoan.

Arazo horren aurrean, “Kultura espazioak” kategoria berria sortzearen alde agertu da taldea, “funtsezko urratsa dela uste baitugu aforo txikiko eta izaera erabat kulturaleko espazioak babesteko, beti ere auzotarrekin elkarbizitza bermatuz. Formatu txikiko musikaren eta zuzeneko arteen aldeko marko normatibo berria behar dugu”, dio taldearen idatziak.

Horren guztiaren aurrean, Arteak Ireki taldeak prentsaurreko eta kontzentrazioa deitu du ostegunerako, otsailak 14, 11:00etan, Gasteizko Florida parkean, Wynton Marsalisen omenezko estatuaren ondoan.