George Steerrek Gerra Zibilari buruz idatzitako saiakera euskaratu du Koro Navarrok

Gernikako bonbardaketaren 82. urteurrenaren atarian, Eusko Jaurlaritzak The tree of Guernica. A fiel study of modern war George Steerren lanaren euskarazko bertsioa aurkeztu du: Gernikako arbola. Gerra modernoaren landa-azterketa bat.

Koro Navarro itzultzaileak euskaratu du lana, eta Mikel Ayestaran kazetariak eta Nicholas Rankin kazetariak, Steerren biografoak, hitzaurre bana idatzi dute.

Bingen Zupiria sailburuak aurkezpenean esan duenez, “erreferentziazko lan bat da. George Steerrek ekarpen oso garrantzitsua egin zuen Gerra Zibilean zehar Euskadin gertatutakoa transmitituz, eta egiarekiko konpromiso irmoa agertu zuen: garai hartako ‘fake news’-en aurka egin zuen”.

Aurretik liburuaren pasarte batzuk euskaratu baziren ere, lehen aldiz euskaratzen da lana osorik. Eusko Jaurlaritzako Argitalpen Zerbitzu Nagusiak argitaratu du, eta datozen egunotan jarriko dute salgai 390 orrialdeko liburua. Bertsio digitala eLiburutegian dago eskuragai.

George Steer (Cambridge, Hegoafrika, 1909 – Yangon, Myanmar, 1944) The Times eta The New York Times egunkarietako berriemaile berezia izan zen Gerra Zibilean, eta bere lana funtsezkoa izan zen Gerran zehar euskal lurraldean gertatutakoak zabaldu ahal izateko.