120 emanaldi, doan
Leioako Umore Azokaren 20. edizioa hasiko da ostegun honetan
Agentziak | Erredakzioa
Gaur, ostegunarekin, abiatuko da kaleko artisten azokaren edizio berria, eta igandean bukatuko da.
Doako 120 emanaldi izango dira Bizkaiko herrian
Leioako Udalak antolatutako Umore Azoka Leioa kaleko artisten azokaren 20. edizioa hasiko da ostegun honetan, maiatzaren 16an, eta ikus-entzule guztiei zuzendutako doako 120 emanaldi baino gehiago eskainiko ditu igandera arte, maiatzaren 19ra arte, antolatzaileek jakinarazi dutenez.
Inaugurazio jardunaldia 18:00etan hasiko da, eta 22 emanaldi eskainiko dituzte, guztira, gauerdira arte.
Leioan lehen aldiz ikusi ahal izango diren antzezlan guztiak Euskal Herriko konpainienak dira: Zanguango Teatroren "Al otro lado", Alvaro Mansoren "Reportero on Fire", Goitibera taldearen "Yijaaa!!!", Toni la Salen "Txontxongilo Bertsolariak", Salitre Teatroren "Mr. Soft. Silence dance o no", La Glo Zirko Dantzaren "Sacred" eta Circo Dabitxiren "La máquina y yo".
Ostiral, larunbat eta igandean ere egongo da zer ikusi, noski, Leioako kaleetan, eta, guztira, doako 120 emanaldi eskainiko ditu kale artisten jaialdiak.