Palmaresa
'Extra Ordinary', Donostiako Beldurrezko Asteko film luzerik onena
Agentziak | Erredakzioa
Mike Ahern eta Enda Loughmanen filmak irabazi du Donostiako Fantasiazko eta Beldurrezko Zinemaren XXX. Astean Film Luzerik Onenari emandako Ikusleen Saria.
'Extra Ordinary' filmaren sekuentzia bat. Irudia: San Sebastian Horror Festival
Mike Ahern eta Enda Loughmanen 'Extra Ordinary' lanak irabazi du Donostiako Fantasiazko eta Beldurrezko Zinemaren XXX. Astean Film Luzerik Onenari emandako Ikusleen Saria. Jaialdia, gaur gauean amaituko da, Donostiako Antzoki Zaharrean, ‘Ventajas de viajar en tren’ filmaren proiekzioarekin.
Nico van de Brinken ‘The Burden/Het Juk’ lanak nazioarteko lehiaketa horretako Film Labur Onenari ikusleek emandako saria lortu du. Halaber, Illogicen ‘Maestro’ filmak Animaziozko Film Labur Onenari Ikusleen Saria irabazi du.
David Muñoz eta Adrian Cardonaren ‘La ultima Navidad del universo’ lanak, berriz, Espainiako Film Labur Onenari ikusleek emandako saria irabazi du. Bestalde, Film Labur Onenaren Epaimahaiaren Saria Dean W. Law zuzendariaren 'Stray' lanak eskuratu du.
Itziar Castrok, Fernando Iwasakik eta Elisa McCauslandek osatutako epaimahaiak aho batez erabaki du Film Labur Onenaren Epaimahaiaren Saria ‘Stray’ri ematea, “bere egikera bikainagatik eta, batez ere, gidoiaren originaltasunagatik, maisutasun handiz heltzen baitie alegoria binarioei; generoari, gorputzari eta animalia instintuei buruzko hausnarketak proposatzen dituzten alegorioak dira, gaur egungo arazoekin elkarrizketan diharduen testuinguru atzerriratu eta deserrotu batean”.
Halaber, Melinda Joan Reed aktorearen antzezpen gailena nabarmendu du epaimahaiak. Bestalde, aipamen berezia egin diote Nico vanden Brinken 'The Burden/Het Juk' film laburrari, “bere istorio biribilagatik, gidoiak, originala izateari utzi gabe, ezin hobeto biltzen baititu aldi berean beldurrezko genero klasikoaren elementu guztiak”.
Erica Scogginsen 'The Boogeywoman' lanak ere aipamen berezia jaso du. Europako Fantasiazko Film Labur Onenaren Zilarrezko Metliesa, berriz, Sesselía Ólafsdottir eta Peter Callowren 'Turn/Umskipti' (2018) lanak jaso du, "hiru neska-lagunen arteko botere harremanak fantasiazko ikuspegi batetik arakatzen dituen proposamen bat izateagatik".
Azkenik, Film Labur Onenaren Gazteen Epaimahaiaren Saria N'cee van Heerdenen 'O.I.' lanak irabazi du, Espainiako Film Labur Onenaren Syfy Saria Norma Vilaren 'El fin de todos las cosas' lanak, Film Luze Onenari Blogos de Oro saria Joe Begosen ‘Bliss’ lanak eta Ikusleen Saria Fanzine Onenari ‘La valla’ lanak.