Zinemaldia
Euskal gastronomia Berlinalen izango da
Arabar Errioxako ardoak, Getariako Txakolinak, arrain kontserbek eta Idiazabal gaztak euskal gastronomia ordezkatuko dute Berlingo zinemaldian.
'Mugaritz BSO' Berlinalen proiektatuko dute. Argazkia: EITB Kultura
Basque Culinary Centerrek eta Eusko Jaurlaritzak 'Euskadiren Eguna' antolatuko dute Berlinen. Gastronomia ikur hartuta, euskal kultura saltzeko modua izango da, eta euskal elikagaiak kanpoan ezagutzeko aukera ere bai. Izan ere, Alemania euskal produktu askoren jomuga baita.
Txalaparta eta musika lagun, hainbat kultur ekitaldi izango dira. Horrez gain, 'Mugaritz BSO' filmaren nazioarteko estreinaldia egingo da Berlinale jaialdian. Andoni Luis Adurizek berak, Elena Arzakek eta Eneko Atxak, 100 lagunentzako luntxa eta 200entzako afaria prestatuko dute.
Arabar Errioxako ardoak ("Araex Export Group" eta Heredad de Ugarte upeltegiaren bitartez), Getariako Txakolinak, arrain kontserbek (CORPA eta José Serratsen oinordekoen enpresen bitartez) eta Idiazabal gaztak (Basque Cheesen bitartez) euskal gastronomia ordezkatuko dute Berlingo zinemaldian.
Gainera, mahai-inguru bat izango da hainbat euskal sukaldarirekin: Andoni Luis Aduriz, Eneko Atxa eta Elena Arzak eta Jose Maria Aizega Basque Culinary Centerren zuzendaria. Gainera, Jose Luis Rebordinos Donostiako Zinemaldiko zuzendaria eta Thomas Struck "Kulinarisches Kino" zikloaren zuzendaria izango dira.