Irisarritik Arberatzera egingo du jauzi EHZ Festibalak datorren urtean

Aurtengoa Irisarrin egingo zen azken EHZ jaialdia izango zela iragarri ostean, Euskal Herriko jaialdirik entzutetsuenetakoak badu helmuga berria, Arberatz, Nafarroa Behereko Amikuze eskualdean. Bertan egingo da 28. Euskal Herria Zuzenean Festibala, 2024ko ekainaren 28tik 30era.

Larunbat goizean egin dute Kanbon biltzar nagusia eta hala erabaki dute jaialdiko antolatzaileek. Aldi berri bati ekingo dio musika jaialdiak, hala. 2019an iritsi zen estreinakoz EHZ Irisarrira, aurretik Arrosa, Idauze-Mendi, Heleta eta Lekornetik igarota. 

Antolakuntzak azken urteetako EHZ Festibalen balantze positiboa egin du gaurko biltzarrean eta azpimarratu dute,nez, Irisarrik egonkortasuna eman dio festibalari. "Berriz laguntzaileak lotu ditu, eredu ekonomikoa egonkortu du eta publikoa ere hor zen". Toki aldaketa, EHZren historian beti egin den joeraren bidetik doala nabarmendu dute, "usu eskutik joan dira belaunaldi aldaketa eta herri berria". Izan ere, euren hitzetan, "toki batean egoteak arrisku bat du: erosotasuna, eta ondorioz gauzak handiago egin nahi izatea".

Hain zuzen ere xumetasun hori ez galtzeko xedez, aldatuko da herriz jaialdia: "EHZ Amikuzen izanen da lehen aldiz. Orain ikustekoa izanen da zer ekarriko dion Arberatzek, Amikuzek, festibalari. Eta festibalak zer duen ekartzeko Amukuzeko eskualdean, hau elkartuke bat baita".